Putin iyo Trump oo ku heshiiay inay is-dhaafsadaan booqashooyin

WASHINGTON - White House-ka ayaa xaqiijiyay waxa mudo saacado ah lagu saxaafadey: waxaa dhacay wicitaan telefoon oo u dhexeeyay Madaxwayne Donald Trump iyo Madaxwayne Vladimir Putin. Labada hogaamiye ayaa ku heshiiay inay isku booqdaan dalalkooda, arrin ay horey uga wada hadleen laakiin aan weli xaqiijin.

Wicitaankan ayaa lagu sheegay inuu ahaa mid miro dhal ah, iyadoo labada hogaamiye ay ku heshiiyeen muhiimadda ay leedahay xiriirka ka dhaxeeya labada dal. Iyada oo ay jireen arrimo siyaasadeed iyo dhaqaale oo muhiim ah, labada madaxwayne ayaa isku raacay in xiriirkooda la xoojiyo, isla markaana la is booqdo si loo xoojiyo wada-shaqeynta dhinacyada amniga, dhaqaalaha, iyo arrimaha caalamiga ah.

Madaxwayne Trump ayaa sidoo kale qorsheynaya inuu wicitaan la yeesho Madaxwayne Volodymyr Zelensky ee Ukraine si ay uga wada hadlaan dagaalka ka socda Ukraine, gaar ahaan xaaladda siyaasadeed ee xilligan.

Waxaa la filayaa in Trump uu ka wada hadli doono sidii taageero dheeraad ah loogu fidin lahaa Ukraine si ay uga hortagto khataraha ka imaanaya Ruushka.

Heshiiskan booqashada labada hogaamiye ayaa noqon doona mid muhiim ah, gaar ahaan xilligan adag ee caalamka oo lagu jiro xiisado siyaasadeed iyo amni oo sii kordhaya, waxayna tani noqon kartaa tallaabo cusub oo lagu xoojinayo xiriirka u dhexeeya Mareykanka iyo Ruushka.

GAROWE ONLINE