Putin oo ka tacsiyeeyay geerida hogaamiyihii Wagner

SAWIR HORE

MOSCOW, Ruushka - Madaxweynaha Ruushka Vladimir Putin ayaa markii ugu horreysay tacsi u diray qoyska hoggaamiyaha kooxda Wagner, Yevgeny Prigozhin, kadib markii si rasmi ah loo xaqiijiyay geeridiisa ka dhalatay shil diyaaradeed oo ka dhacay waqooyiga Moscow Arbacadii.

Putin wuxuu ku sheegay hadaladiisa - maanta oo Khamiis ah - inuu yaqaanay Prigozhin tan iyo 1990-meeyadii, uuna ahaa "ganacsade karti leh", laakiin uu ku dhacay khaladaad, sida uu hadalka u dhigay.

Madaxweynaha Ruushka ayaa ammaanay wax uu ku tilmaamay gacan weyn oo ay kooxda Wagner ka geysatay dagaalka lagula jiro Naasinimada ee Ukraine, wuxuuna sheegay in Moscow aysan waligeed iloobi doonin taas.

Isagoo ka hadlaya sababta keentay burburka diyaaradda, ayuu Putin yiri, "Waan sugi doonnaa natiijada ka soo baxda baaritaannada," isagoo xusay in xogta hordhaca ah ay muujinayaan in diyaaradda ay saarnaayeen hogaamiyeyaasha Wagner.

Putin ayaa sheegay in Prigozhin uu ka soo laabtay Afrika shalay, wuxuuna kulamo muhiim ah la qaatay mas’uuliyiin ka tirsan dalka Ruushka ka hor inta aysan burburin diyaaradiisii.

GAROWE ONLINE