Ra'iisul Wasaaraha UK oo ka hadlay cadaadiska canshuuraha Trump iyo mowqifka Greenland

LONDON - Ra’iisul Wasaaraha Britain, Keir Starmer, ayaa shir jaraa’id ku qabtay xarunta Downing Street, xilli uu cirka isku sii shareerayo muran diblomaasiyadeed oo u dhexeeya Mareykanka iyo xulafadiisa NATO, kaas oo salka ku haya hadallo ka soo yeeray Madaxweyne Donald Trump oo ku saabsan Greenland.

Trump ayaa ku hanjabay in uu saari doono canshuuro cusub oo gaaraya 10% dalal ay ka mid tahay Boqortooyada Midowday (UK), kuwaas oo ka soo horjeestay fikraddiisa ah in Mareykanku la wareego Greenland. Sidoo kale, waxa uu sheegay in uu u kordhin karo canshuuraha xulafada NATO ilaa 25% laga bilaabo 1-da Juun, haddii aan heshiis laga gaarin arrintaas.

Xafiiska Ra’iisul Wasaaraha Britain ayaa Axaddii sheegay in Starmer si toos ah ugu sheegay Trump in hanjabaadaha noocaas ah ay “khalad” yihiin, isla markaana ay halis ku yihiin xiriirka xulafada. Dalal dhowr ah oo ay ka mid tahay UK ayaa soo saaray bayaan wadajir ah, iyagoo muujiyay midnimo buuxda iyo taageero ay u hayaan Boqortooyada Denmark iyo shacabka Greenland.

Starmer, oo ay garab taagnaayeen Wasiirka Arrimaha Dibadda Yvette Cooper iyo Wasiirka Maaliyadda Rachel Reeves, ayaa sheegay in mustaqbalka Greenland uu go’aan ka gaarayo dadkeeda iyo Denmark oo keliya. “Xiriirrada xulafadu way sii jiraan marka ay ku dhisan yihiin ixtiraam iyo iskaashi, ma aha cadaadis,” ayuu yiri.

Ra’iisul Wasaaruhu waxa uu ku nuuxnuuxsaday in Britain iyo Mareykanku yihiin saaxiibo iyo lammaane dhow, isla markaana xiriirkaas uu muhiim u yahay labada dhinac. Wuxuu sheegay in khilaafaadka la wajihi karo iyada oo aan la gelin dagaal ganacsi, maadaama “tallaabooyinka noocaas ah aanay dan u ahayn cidna.”

Dhinaca kale, qaar ka mid ah xildhibaanada UK, oo uu ku jiro hoggaamiyaha xisbiga Liberal Democrats Sir Ed Davey, ayaa ku baaqay in dib loo eego booqashada rasmiga ah ee la qorsheeyay in Boqorka Britain ku tago Mareykanka, haddii Washington ay sii wado hanjabaadaha canshuuraha. Si kastaba ha ahaatee, Wasiirka Dhaqanka Lisa Nandy ayaa hoos u dhigtay baaqaas, iyadoo sheegtay in xiriirka labada dal uu ka ballaaran yahay hal arrin oo siyaasadeed.

GAROWE ONLINE