Senator ka tirsan Aqalka Sarre ee Mareykanka oo geeriyooday
-
WARIYAHA WASHINGTON GAROWE ONLINE
- Posted On 17-10-2019, 03:45PM
WASHINGTON, US – Mudane ka tirsan xubnaha xisbiga dimoqraadiga ku metela Aqalka Sarre ee Mareykanka, Elijah Cummings, kaasi oo aad ugu lug-lahaa mooshinka xilka ka qaadista Trump, ayaa dhintay isaga oo 68-sano jir ah.
Xafiiskiisa ayaa shaaca ka qaaday in uu u geeriyooday max-suulka "dhibaato caafimaad oo in muddo ah uu la il-darnaa".
Gudoomiyaha Guddiga Kormeerka iyo Dib u habeynta Xukuumadda ee Golaha Wakiilada Mareykanka, ayaa isku dabariday baaritaano ka dhan ah maamulka Trump.
Loolanka liddiga u ah siyaasadaha daryeelka caafimaadka iyo socdaalka ayuu sidoo kale safka hore kaga jiray Elijah Cummings.
Xubno dhowr ah oo kamid ah xeer-dejinta Mareykanka ayaa tacsi u diray eheladda, iyaga oo ku bogaadiyey kaalintiisa dowladnimada.
Horaantii sanadkan, iyadda oo lagu guda jiray dood ku saabsan qabashada soo galootiga, Mr Cummings ayaa duray Sii-haayaha Wasiirka Arrimaha Gudaha, Kevin McAleenan, isaga oo ku sifeeyay "mid aanan naxariis-laabe ah".
Trump oo todobaad kadib ka fal-celiyay hadaladaas ayaa Xildhibaanka ku tilmaamay "jiir [dooli] xanaaqsan oo madax kuusan leh".
Sharcidejiyeyaal kala duwan oo kamid ah xisbiga diqmoraadiga kuwaas oo u muuqda in ay taageero weyn u muujinayaan Elijah Cummings ayaa erayadda kasoo yeeray Trump waxay ku qeexeen kuwa ku dheehan "cunsuriyad".
GAROWE ONLINE
