Shacabka dalka Gabon oo ka walaacsan fowdo siyaasadeed
-
- Posted On 24-09-2016, 10:08AM
Wararka laga helayo dalka Gabon ayaa sheegaya in shacabka ku jiraan diyaar garow xooggan iyagoo ku mashquulsan iibsiga waxyaabaha daruuriga ah.
Bulshada qaybaheeda kala duwan ayaa safaf dhaadheer ugu jira dukaamadda iyo xawaaladaha waddankaas si ay qaataan wax allaale iyo waxay awoodaan.
Shacabka ku nool caasimadda Libreville ee dalka Gabon, ayaa ka walaacsan muranka siyaasadeed oo muddooyinkii dambe ka taagnaa dalkaas, kadib guushii uu gaaray madaxweyne Cali Bongo.
Waxay taxadar ka muujinayaan rabshado bilowda maadama mucaaradku si weyn uga biyo diidsanyihiin natiijadii doorashada iyagoo madaxweynahan mudada dheer dalkaasi ka talinayay ku dhaliilay inuu codadkii doorashada ku shubtay.
Maxkamadda Dastuuriga ah ee dalkaas ayaa go'aan ka gaari doonta natiijada doorashada lagu muransanyahay.
Dowladda dalkaasi ayaa sheegtay in hogaamiyaha mucaraadka, Jean Ping, uu qaadi doono mas'uuliyadda rabshadaha ka dhasha go'aanka maxkamadda.
Madaxweyne Cali Bongo ayaa lix boqol oo kun oo cod kaga guuleystay ninka la tartamayay ee Jean Ping, balse mucaaradka ayaa ku doodaya in doorashadaasi lagu shubtay.
GAROWEONLINE
