Shaqsi 10-sano loogu xukumay in uu dhaliilay dowladiisa

ABU DHABI, UAE – Maxkamad ku taala Isu-tagga Imaaraadka Carabta ayaa 10-sano oo xabsi ah waxay ku xukuntay muwaadin u dhashay Jordan kaas oo lagu eedeeyay in uu dhaleeceeyay dowladiisa, sidda ay ku warantay Hay'adda u dooda xuquuqda aadanaha ee Human Rights Watch [HRW].

Axmed Etoum oo ah 46-sano jir degan waddanka Imaaraadka Carabta ayaa xukunka lagu ridday bishii October, 2020.

Sidda ay sheegtay HRW, waxaa loo maxkamadeeyay "qoraalo dhaliil nabdoon oo uu Facebook u mariyey qoyska boqortooyadda Urdun iyo xukuumadda taladda haysa".

Sidda ku xusan qoraalka HRW, maxkamadda ayaa sheegtay in ay ku heshay Axmed Etoum in uu ku kacay "fal-dambiyeed ka dhan ah dowlad shisheeye taas oo waxyeeleyn karo xiriirka siyaasadeed khatartna gelinaya ammaanka heer qaran ee gudaha dowladda Isu-tagga Imaaraadka Carabta".

Etoum oo isaga oo ay wehliso xaaskiisa iyo laba caruur oo uu dhalay ku nool Abu Dhabi shantii sano ee lasoo dhaafay ayaa ah Barre Iskuul.

Bartiisa gaarka ah ee mareegta Facebook oo ay ku xiran yihiin in ka badan afar kun ruux wuxuu ku cabiraa fekerkiisa ku aadan xaaladaha ka oogan waddankiisa oo qalalaasaha dhaqaalaha uu yahay mid kasii daraya.

Ugu dambeyntii, HRW ayaa ugu baaqdey Imaaraadka Carabta in ay si deg-deg ah uga laabato xukunka ay ku ridday Axmed Etoum "kaas oo xadgudub iyo meel ka dhac ku ah xuquuqda uu qofka shaqsi ahaan u leeyahay in uu oraahdiisa kusoo bandhigo meesha uu doono waqtiga uu ku talagalo".

GAROWE ONLINE