Shilkii Diyaaradeed ee Ka Dhacay Reagan Washington: Khaladaadkii Sababay Dhimashada

Washington, D.C. – Warbixino horudhac ah oo laga helay shilkii diyaaradeed ee Arbacadii ka dhacay Washington, D.C., kaasoo ay isku dhaceen helikobtar ay lahaayeen ciidamada Mareykanka iyo diyaarad rakaab ah oo ay leedahay American Airlines, ayaa muujinaya in khaladaad badan ay ka jireen nidaamka badqabka duulista, sida laga soo xigtay codad la duubey, warbixinta hordhaca ah ee Hay’adda Duulista Federaalka Mareykanka (FAA), iyo waraysiyo lala yeeshay saraakiil iyo shaqaale hore oo ka tirsan xakamaynta duulista.

Saddex Khalad oo Sababay Shilka

Warbixinada hordhaca ah ayaa tilmaamaya in ay jireen saddex arrimood oo ugu waaweyn ee sababay shilka:

1. Helikobtarku wuxuu ka baxay waddadii loo oggolaaday oo uu ku duulayay meel aan ahayn.

2. Duuliyeyaasha American Airlines uma muuqan helikobtarka xilliga ay leexanayeen si ay ugu degaan garoonka.

3. Hagayaasha diyaardaha ee tower-ka joogay wuxuu isku waday laba shaqo, taasoo keentay in uusan awoodin inuu si hubanti leh u kala saaro diyaarada iyo helikobtarka.

Digniino Hore oo Laga Bixiyay Khatarta Badqabka Duulista

Shilkan wuxuu xoojinayaa cabashooyin ay sanado badan muujiyeen duuliyeyaasha, hagayaasha diyaardaha iyo khubarrada badqabka duulista, kuwaas oo ka digayay in nidaamka duulista Mareykanka ay ku soo kordhayaan daldaloolo badan, taasoo horseedi karta shilal halis ah. 67 qof ayaa ku dhintay shilkan, taasoo muujinaysa halista sii kordhaysa ee badqabka duulista.

Xaalad Aan Caadi Ahayn oo Ka Jirtay Garoonka Reagan National

Baarayaashu waxay sidoo kale xuseen in maamulka garoonka Reagan National uu sameeyay go’aan aan caadi ahayn kahor shilka. Sida caadiga ah, shaqaalaha duulista ee garoonka Reagan waxay kala saaraan diyaaradaha iyo helikobtarada goor dambe habeenkii, balse isagoo aan gaarin xilligaas, sarkaalka kormeeraha ah ayaa isku keenay shaqadii laba hage isagoo  mid ka mid ah fasaxay.

Waxaa la ogaaday in:

• Hagaha diyaarada ee tower-ka joogay uu isku waday duulimaadyada diyaaradaha iyo helikobtarada, taasoo aan caadi ahayn.

• Shaqaaluhu waxay caadiyan isbeddelaan 9:30 fiidnimo markii garoonka uu yaraado culeyskiisa, balse shilku wuxuu dhacay kahor 9:00 fiidnimo, iyadoo culeyska duulimaadyadu wali jiraan.

Suuragalnimada Khalad Bani’aadan

Shaqaalaha hagista diyaardaha ee tower-ka joogay xilliga shilka ayaa lagu eedeeyay in ay ahayd inuu si firfircoon u haggo diyaaradaha iyo helikobtarada si ay u kala fogaadaan. Balse taa beddelkeeda, wuxuu kaliya ku yiri helikobtarka “Ka fogaada diyaarada”, taasoo aan lahayn tilmaamo sax ah oo ku saabsan jihada uu aadayo.

Xilliga habeenka ayaa sidoo kale loo sababeeyay in ay adkayd in duuliyeyaasha diyaaradaha ay si sax ah u arkaan masaafooyinka u dhaxeeya diyaaradaha kale. Waxaa sidoo kale la tuhunsan yahay in duuliyeyaasha helikobtarku ay ku qaldameen diyaarad kale oo ay u haysteen midda American Airlines.

Helikobtarka Wuxuu Ku Duulay Meel Aan Loo Oggolayn

Xogaha laga helay baaritaanka waxay muujinayaan in helikobtarku uu ka baxey waddadii loo asteeyay. Sida sharcigu dhigayo:

• Helikobtarku wuxuu ogolaansho u qaatay waddo ay helikobtaradu maraan oo ah hareeraha webiga Potomac si ay uga fogaadaan duulimaadyada rakaabka.

• Hagayaashq duulista ayaa faray in helikobtarku raaco diyaarad kale oo yar oo ka duuleysay goobta.

• Balse helikobtarku wuxuu ka baxay waddadii loo asteeyay, isagoo u duulay meel 300 feet ah halkii uu ka duuli lahaa 200 feet, wuxuuna qiyaastii nus mayl ka baxay xariiqdii loo oggolaaday.

Sarkaal sare oo ka tirsan ciidamada Mareykanka ayaa ka digay in go’aan degdeg ah laga gaaro sababta shilka ilaa mashiinka duubaya xogta duulimaadka (black box) laga soo saaro helikobtarka burburtey. Waxa uu xusay in duuliyeyaasha Black Hawk ay si wanaagsan u yaqaaneen waddada ay marayeen iyo xeerarka u degsan duulimaadka garoonka Reagan National.

Dhibaatooyinka Sii Kordhaya ee Badqabka Duulista

Warbixintan waxay hoosta ka xariiqaysaa dhibaatooyinka sii kordhaya ee ka taagan nidaamka duulista Mareykanka, oo ay ka mid yihiin:

• Sii kordhida mashquulka garoomada waaweyn sida Reagan National, halkaas oo ay joogaan diyaarado rakaab, duulimaadyada gobolka, iyo diyaaradaha milatariga.

• Shaqaale yari ba’an oo ka jirta hagayaasha diyaardaha, taasoo keentay in shaqaaluhu shaqeeyaan lix maalmood usbuucii iyo 10 saacadood maalin walba, taasoo keeni karta daal badan.

• Shaqaale aan ku filneyn tower-ka Reagan National, oo lagu waday inay shaqeeyaan 30 hagayaal, balse bishii Sebtember 2023, waxaa shaqeynayay 19 oo kaliya. Waqtigaan la joogo, FAA waxay sheegtay in 25 hagayaal ay joogaan halka ay ahayd inay ahaadaan 28.

FAA ayaa xustay in xakamayaha duulista ee maareynayay diyaaradaha iyo helikobtarka xilligii shilka uu waday shaqo u baahan labo shaqaale, taasoo culays badan saartay.

Xogaha la helay ayaa sidoo kale muujinaya in diyaaradda American Airlines ay markii hore oggolaatay in ay ku degto dhabaha weyn ee garoonka (Runway 1), balse hagaha ayaa uga beddelay dhabaha kale (Runway 33), taasoo laga yaabo inay sii adkaysay xaaladda.

Baaritaanka shilkan ayaa socon doona bilooyin, iyadoo lagu saleyn doono xogta duulimaadka, xaaladda cimilada, iyo wareysiyo lala yeelanayo dhammaan shaqaalaha la xiriira shilka. Balse waxa muuqata in khaladaad badan oo dhinaca badqabka duulista ah ay fududeeyeen shilkan, taasoo muujinaysa baahida degdegga ah ee dib-u-habeyn ku saabsan nidaamka hagista duulimaadka Mareykanka.

GAROWE ONLINE