Trump oo Cunaqabateyn ku soo rogay Madaxweynaha Colombia iyo Qoyskiisa

Washington – Maamulka Madaxweyne Donald Trump ayaa Jimcihii ku soo rogay cunaqabateyn Madaxweynaha Colombia, Gustavo Petro, iyo qoyskiisa, iyadoo xiisadaha u dhexeeya Washington iyo Bogotá ay sii kordhayaan sababo la xiriira ka ganacsiga daroogada iyo weerarada Mareykanka uu ku qaaday doonyo la sheegay inay daroogo wateen.

Waaxda Maaliyadda Mareykanka ayaa cunaqabateyn shakhsi ah ku soo rogtay Petro; xaaskiisa Veronica; wiilkooda Nicolas; iyo Wasiirka Arrimaha Gudaha Colombia, Armando Benedetti, iyagoo lagu eedeeyay “inaan si muuqata u joojin wax-soo-saarka daroogada sharci-darrada ah.”

“Tan iyo markii Madaxweyne Gustavo Petro xukunka yimid, wax-soo-saarka cocaine-ka ee Colombia ayaa kor u kacay ilaa heerkii ugu sareeyay tobannaan sano, isagoo Maraykanka ku fatahay isla markaana sun u noqday muwaadiniinta,” ayuu yiri Xoghayaha Maaliyadda, Scott Bessent, isagoo war-saxaafadeed soo saaray. “Petro wuxuu u oggolaaday kooxaha daroogada inay barwaaqoobaan, wuxuuna diiday inuu joojiyo howlahaas. Maanta, Madaxweyne Trump wuxuu qaaday tallaabo adag si uu u ilaaliyo qarankeena una caddeeyo inaanan aqbali doonin ka ganacsiga daroogada ee ku soo socda dalkeenna.”

Safaaradda Colombia ee Washington wali kama aysan jawaabin codsi warbixin. Petro ayaa cunaqabateynta ku tilmaamay “mucjiso,” isagoo xusay in Colombia tobannaan sano ay ka caawisay Maraykanka la-dagaallanka ka ganacsiga daroogada.

Xiriirka u dhexeeya Maraykanka iyo Colombia, oo muddo dheer ahaa saaxiibka ugu muhiimsan ee Washington ee Koonfurta Ameerika, ayaa bilihii ugu dambeeyay noqday mid aad u xiisad badan. Maamulka Trump ayaa ku eedeeyay Petro iyo dowladdiisa bidixda ah inaysan xadidin ganacsiga daroogada, isla markaana weeraro ku qaaday doonyo la sheegay, iyada oo aan caddeyn jirin, inay daroogo u wadaan Maraykanka.

Bishii Sebtembar, Waaxda Arrimaha Dibadda Mareykanka ayaa ka qaaday fiisaha Maraykanka ee Petro, iyagoo ku eedeeyay inuu “ciidamada Mareykanka ku dhiirigeliyay inay ka hor yimaadaan amarrada oo ay kiciyaan rabshado” intii uu ka hadlayay banaanbax taageero u muujinayay Falastiin ee New York. Isla bishaas, maamulka ayaa dhaqaaqay si uu u joojiyo aqoonsiga Colombia ee la-hawlgalayaasha la-dagaallanka daroogada, inkasta oo tallaabadan ay ahayd mid calaamadeyn ah, maadaama Maraykanku uu Colombia siiyay oggolaansho gaar ah oo ka dhigay in dhammaan gargaarka iyo iskaashiga uu sii socdo.

GAROWE ONLINE