Xabaal wadareed laga helay Palmyra
-
- Posted On 02-04-2016, 04:23PM
Saraakiisha ammaanka dalka Suuriya, ayaa xaqiijiyay in ciidamadooda ammaanka dalkaasi heleen xabaal lagu aasay ku dhawaad 40 ruux ku jiraan haween iyo carruur, wax tacadigaasi lagu eedayay kooxda Daacish oo muddo magaalada taariikhiga ah gacanta ku haysay.
Dadka dhintay ayaa dhammaantood lagu aasay hal good, waxaana loo malaynayaa in dhammaantood waqti isku mid ah la dilay.
Lama sheegin sababta loo dilay, balse waxaa la tuhmayaan inay kamid tahay tacadiga kooxda ISIS.
Ciidamada Assad ayaa magaalada Qadiimiga ah ka qabsaday ISIS Axaddii la soo dhaafay.
Palmyra, oo ku jirta liiska goobaha taariikhiga ah ee Hey’adda Seyniska iyo Dhaqanka ee Qaramada Midoobay ee marka la soo gaabiyo la yiradhdo UNESCO, ayaa horey u aheyd magaalo ay u dalxiis tagaan kumanaan kun oo qof sanad walba.
ISIS ayaa magaaladaa ka qabsatay ciidmada dowladda dagaal maalmo socday bartamihii bishii May ee sanadkii 2015kii, iyagoo markii dambana burburiyay – dhismooyin badan oo la dhisay xilligii boqortooyadii Romanka, muddo ku dhawaad 2,000 oo sanadood haatan laga joogo.
GAROWEONLINE
