Xisbiga Likud oo hoggaaminaya doorashada guud ee Israel
-
- Posted On 18-03-2015, 04:17AM
March 18, 2015 (GO- Natiijada hordhaca ah ee kasoo baxaysa doorashadii guud ee shalay ka dhacday Israel ayaa muujineysa in xisbiga Likud uu waxyar ka horreeyo xisbiga Sahyuuniga ah ee bidix dhexe.
70% codadka doorashada ayaa la tiriyey, waxaana 23. 73% ku hoggaaminaya xisbiga Likud ee Ra'isal Wasaare Benjamin Netanyahu ka tirsan yahay ,halka xisbiga Sahyuunigu haysto 19.06% codadka ilaa iyo hadda la tiriyey.
Benjamin Netanyahu ayaa goor hore shaaciyey in xisbigiisu ku guuleystey doorashada, balse Isaac Herzog oo ah hoggaamiyaha xisbiga loolanka kula jira, ayaa sheegay in natiijada aan laga hordhici karin maadaama tirada codadka labada xisbi heleen ay aad isugu dhow dahay.
Doorashadan ayaa ahayd tii ugu xamaasadda badneyd ee in muddo ah ka dhacda Isreal, waxaana loo tartamayaa kuraasta barlamanka oo guud ahaan tiradoodu tahay 120 kursi.
Haddii xisbiga Likud ku guuleysto doorashada, waxay taasi fursad u siineysaa Benjamin Netanyahu in markii afraad uu dalkaas Ra'isal Wasaare ka noqdo.
GAROWE ONLINE
