Puntland: Doon ku Caariday Dekedda Boosaaso

BOOSAASO, Puntland- Doon kamid ah kuwo u rarnaa Ganacsato reer Puntland ah ayaa ku caariday dekedda Boosaaso ee xarunta ganacsiga Puntland, sida ay GO u xaqiijiyeen dad goob joogayaal ah iyo howlwadeeno ka shaqeeya dekedda.

Doonidan oo la sheegay inay waddo Gaadiid, Raashin iyo Bagaash ayaa shalay ku soo gaartay dekedda iyado ciladaysan kadibna codsatay in la xiro si alaabta looga dejiyo.

Sida wararku sheegayaan maamulka dekedda ayaa diiday in doontu xirato sababo aan la shaacin, taasoo kaliftay inay u caarido dhanka Badweynta.

"Doonta walaalo iyadoo daloosha ayay shalay kusoo xiratay dekedda Boosaaso, waxay codsatay in alaabta laga dejiyo, laakiin maamulka gacanta ku haya dekedda ayaa diiday," sidaas waxaa yiri mid kamid ah howlwadeenadda dekedda oo intaas ku daray, "Xaaladda dekedda iminka waa Konton Konton inay bad-baado biyo ayaa hoosta ka galay, waxayna hadda u soo caariday dhinaca Bariga."

Xiriiro aan la samaynay wasaaradda qaabilsan arrimaha dekedda nooma suurto galin inaan helno, balse qaar kamid ah shacabka doontu u rarnayd ayaa wada dedaalo ay kusoo bad-baadinayaan doontaas.

Doontan oo magaceeda lagu sheegay Al Xafiis islamarkaana ay leeyihiin Hindi, ayaa qaada 1500 tan, waxaana Caaritaankeedu kusoo aaday xilli dekedda Boosaaso ay tahay mid aad u mashquul badan maalintii.

Al Xafiis ayaa kasoo safartay Dubai oo ah halka inta badan ganacasatada Soomaaliyeed wax kasoo dhoofsadaan.

Majirto wax war ah oo ilaa hadda kasoo baxay dowladda iyo dadkii ay alaabta u siday doontan.

Maaha markii ugu horaysay ay dagto doon u rarnayd ganacsato Soomaaliyeed, balse tan ayaa kusoo beegmay xilli maamulka dekedda loo dhiibay shirkad lagu mgacaabo PO&Port, taasoo dowladda Puntland heshiis kula gaartay inay ballaarin doonto islamarkaana dayactir ku samayn doonto.

GAROWE ONLINE