Al-shabab oo sheegtay mas'uuliyadda qaraxii ka dhacy Hotel SYL
-
- Posted On 23-01-2015, 04:02AM
January 23, 2015 (GO)- Kooxda al-Shabaab ayaa sheegatay mas'uuliyadda weerarkii is-miidaaminta ahaa ee shalay ka dhacay afaafka hore ee Hotel SYL ee magaalada Muqdisho.
Af-hayeenka hawlgallada al-shabaab, Cabducasiis Abu-Muscab ayaa sheegay in weerarkaas iyagu ka dambeeyeen kuna dileen saraakiil ka tirsan ciidamada Soomaaliya.
Af-hayeenku wuxuu ku goodiyey inay sii wadi doonaan weerarada ay ka geysanayaan magaalada Muqdisho.
Dhanka kale, waxaa 24tii saac ee ugu dambeeyey si weyn loo adkeeyey ammaanka magaalada Muqdisho, halkaasoo la filayo in maanta uu soo gaaro Madaxweynaha Turkiga Recep Tayyib Erdogan iyo wafdi ballaaran oo uu hogaaminayo.
Inta bada jidadka muhiimka ah ayaa xiran, waxaana la xakameeyey dhaq-dhaqaaqa dadka iyo gaadiidka.
Booqashada Recep Tayyib Erdogan ayaa noqoneysa tii labaad ee uu Muqdisho ku yimaado. Sanadkii 2011, markaasoo macaluuli ka jirtey qaybo kamid ah gobolada koonfureed ee dalka ayaa Erdogan -oo markaas ra'isul wasaare ahaa- iyo xaaskiisu booqasho taariikhi ah kusoo gaareen Muqdisho.
Booqashadaas ayaa indhaha caalamka usoo jeedisey Soomaaliya. Mudada uu Muqdisho ku sugan yahay, Madaxweynaha Turkigu wuxuu la kulmi doonaa madaxda dalka, qaybaha kala duwan ee bulshada isagoo sidoo kale booqan doona mashaariic dowlada Turkigu ka fulisey Muqdisho.
GAROWE ONLINE
