Amaanka Gaalkacyo oo la adkeeyay iyo Farmaajo oo ku wajahan

GAALKACYO, Soomaaliya - Sida Warsidaha Garowe Online soo qoray shalay, Wadfiga Madaxweynaha Soomaaliya Maxamed Cabdullaahi Farmaajo ayaa maanta oo sabti ah ku wajahan magaalada Gaalkacyo, ee xarunta gobolka Mudug.

Madaxweyne Farmaajo oo haddan ku sugan magaalada Boosaaso ee xarunta gobolka Bari ayaa la filayaa in Gaalkacyo uu kula kulmo Madaxweynaha Galmudug Axmed Ducaalle Geelle Xaaf, Wasiirro, Xildhibaano, iyo qeybaha kala duwan bulshada.

Amaanka Gaalkacyo ayaa aad loo adkeeyay waxaan ku sugan wafdi hordhac ah oo u gogol-xaaraya booqashada Farmaajo, taasi oo qeyb ka ah socdaal uu ku bixinayo gobollada dhexe ee dalka kadib markii uu mudo todobaad ah uu ku sugnaa Puntland.

Madaxweynaha ayaa labo cisho joogi doona Gaalkacyo, oo u kala qeybsan Puntland iyo Galmudug, waxaana magaalada shacabkeeda iyo mas'uuliyiinteeda u diyaar-garoobeen soo dhaweynta Farmaajo.

Wafdiga Madaxweynaha ayaa uga soo gudbi doona Gaalkacyo dhanka Cadaado iyo Dhuusamareeb, oo hoostaga Galmudug, halkaasi oo uu kusoo gaba-gabeyn doono socdaalkiisa mudad qaatey ee uu ugu kuur-galayo xaalada gobollada dalka.

GAROWE ONLINE