Cabsidii laga qabay in Galmudug yeelato madaxweyneyaal oo korodhay

DHUUSAMAREEB, Galmudug – Baqdintii ku saabsaneyd in Galmudug yeelato madaxweyneyaal iska soo horjeeda ayaa maanta oo Arbaco ah xoogeysatay, sidda ay xaqiijiyeen warar kala duwan.

Cabsidda ayaa meeshii ugu sareysay gaartay kadib markii guddiga doorashada dowlada iyo Ahlu Sunna ay dardargeliyeen dhaqdhaqaaqyadda ay kawadaan Dhuusamareeb.

Garabka xukuumada federaalka ayaa dhageysatay khudbadaha siyaasiyiin uu kamid yahay murashaxa "ay maal-gelineyso" Villa Soomaaliya. Berri ayay dooran doonan madaxweyne iyo ku xigeen.

Dhanka kale, guddiga ay magacowday Ahlu Sunna ayaa shaaciyey in ay Sheekh Shaakir u diiwaan-geliyeen murashax madaxweyne, isla markaana uu ku biirayo laba kale.

Warar isa-soo-taraya ayaa tibaaxaya in ay suurtogal tahay in isla maanta ay Ahlu Sunna ku dhawaaqdo madaxweyne.

Axmed Macalin Fiqi, oo ka tirsan Aqalka Hoose ee baarlamaanka federaalka Soomaaliya, ayaa rumeysan in Xildhibaanada Ahlu Sunna ay hogaamiye u dooran doonan Shaakir.

Geesta kale, madaxweyne Axmed Ducaale Geelle "Xaaf" ayaa koonfurta magaalada Gaalkacyo kawada qaban-qaabada doorasho kale.

Murashaxiinta mucaaradka oo horey kaga digay in ay soo baxaan arrimahaan ayaa ku adkeystay baahida loo qabo wadahadal iyo is-qanci si loosoo afjaro ismaandhaafka.

Beesha Caalamka oo bayaan ku muujisay dhexdhexaadnimo ayaa darafyadda ku boorisay in ay sameeyaan tanaasul si loo helo maamul loo dhan yahay oo ay ka faa'iidaan bulshadda Galmudug.

GAROWE ONLINE