Cali Balcad: DFS waxay diyaar u tahay inay Somaliland la wadaagto dakhliga e-Visa
-
GAROWE ONLINE
- Posted On 22-11-2025, 11:47AM
Muqdisho, 22 Nofeembar 2025 — Dowladda Federaalka Soomaaliya ayaa ku dhawaaqday inay diyaar u tahay wadaagista dakhliga kasoo xarooda nidaamka fiisaha elektarooniga ah (e-Visa) ee dalka, iyadoo wadahadallo furan u ballanqaadday Somaliland iyo dowlad-goboleedyada kale.
Wasiiru-dowlaha Arrimaha Dibadda, Cali Maxamed Cumar (Balcad), ayaa arrintan ka sheegay wareysi uu siiyay warbaahinta, kadib markii la weydiiyay sida dowladda u wajahday cabashooyinka Somaliland ee ka dhanka ah hirgelinta nidaamka e-Visa.
Balcad wuxuu sheegay in dowladda Federaalka ay aqbashay in laga wada hadlo dakhliga kasoo xarooda e-Visa, isla markaana Wasaaradda Maaliyaddu diyaar u tahay inay ka qaybqaadato nidaam wadaagis dhaqaale oo la xiriira fiisaha elektarooniga ah.
“Dowladdu diyaar bay u tahay wadahadal ku saabsan dakhliga ka soo xarooda e-Visa, Wasaaradda Maaliyadduna diyaar bay u tahay inay wadaagto,” ayuu yiri Balcad.
Nidaamka e-Visa oo si buuxda u dhaqangalay Sebtembar 2025, ayaa qof kasta oo fiiso dalbanaya ku waajibinaya lacag dhan $64, taas oo dowladda sheegtay inay si toos ah ugu dhacdo khasnadda Qaranka.
Somaliland ayaa hore u diiday hirgelinta e-Visa, iyadoo tallaabadaas keentay in dadka yimaada garoomada ay maamusho ay laba jeer bixiyaan lacagaha fiisaha — mid ay qaado Dowladda Federaalka iyo mid kale oo Somaliland ay ku khasabto socotada.
GAROWE ONLINE
