DFS oo ka digtay in la jebiyo nidaamka duulista hawada Soomaaliya

MUQDISHO, Soomaaliya – Hay’adda Duulista Rayidka ee Soomaaliya (SCAA) ayaa sheegtay in ay si buuxda u hayso awoodda sharci ee maamulidda iyo kormeerka hawlaha duulimaadyada ee ka jira aagga Mogadishu Flight Information Region (FIR), iyadoo ka digtay in aan la jebin shuruucda iyo heerarka Caalamiga ee Ururka Duulista Rayidka Adduunka (ICAO).

Hay’addu waxay sheegtay in jebinta ama iska indha-tirka nidaamka caalamiga ah ee duulista rayidka ay keeni karto khatar dhinaca badqabka ah iyo cawaaqib sharci oo culus oo saameyn kara shirkadaha duulimaadyada iyo maamulka hawada ee dalka.

War-saxaafadeedka SCAA ayaa imaanaya kadib markii maalmihii lasoo dhaafay ay soo baxeen warar sheegaya muran ka dhashay maamulka hawada Soomaaliya, kadib markii maamulka Somaliland uu soo saaray amar mamnuucaya diyaaradaha inay galaan hawada Somaliland iyada oo aan oggolaansho hore laga helin.

Somaliland ayaa ku dhawaaqday inay ka go’day Soomaaliya sannadkii 1991, balse Dowladda Federaalka Soomaaliya wali waxay u aragtaa Somaliland qayb ka mid ah dhulka Jamhuuriyadda Federaalka Soomaaliya.

Hay’adda Duulista Rayidka Soomaaliyeed ayaa hoosta ka xarriiqday in maamulka Mogadishu FIR uu yahay mid ay si rasmi ah u aqoonsan tahay ICAO, isla markaana ay Soomaaliya si toos ah uga mas’uul tahay kormeerka iyo maaraynta dhammaan hawada sare ee dalka, iyadoo la raacayo heshiisyada iyo nidaamka caalamiga ah ee duulista.

SCAA ayaa ugu baaqday dhammaan dhinacyada ay khuseyso, oo ay ku jiraan shirkadaha duulimaadyada gudaha iyo dibadda, inay si buuxda ugu hoggaansamaan shuruucda iyo tilmaamaha wasaaradda iyo hay’adda duulista, si loo ilaaliyo badqabka, sharciyadda iyo isku xirka duulimaadyada Soomaaliya.

GAROWE ONLINE