Diyaarad khamri siddey oo garoonka Muqdisho lagu qabtey
-
- Posted On 25-02-2015, 06:28AM
February 25, 2015 (GO)- Garoonka diyaaradaha magaalada Muqdisho waxaa lagu qabtey diyaarad siddey shixnad khamri ah.
Taliyaha hoggaanka ilaalada Canshuuraha iyo Dhaqaalaha ee Booliska Dowladda Federaalka Cabdullaahi Xasan Bariise oo warbaahinta la hadlay ayaa ka warbixiyey khamrigan iyo qaabkii lagu qabtey.
Bariise wuxuu sheegay in khamriga oo kartoonno lagu soo cabbeeyey tira ahaana gaaraya 25,416 la doonayey in si qarsoodi ah magaalada Muqdisho loo soo geleyo.
Taliyuhu faah faahin kama bixin cidda iska leh maandooriyaha gacanta lagu dhigey iyo weliba halka laga keenay.
October 2014 ayey ahayd markii sidan oo kale dekedda magaalada Muqdisho loogu qabtey labo konteenar oo khamri ah.
Khamriga ugu badan ee Soomaaliya soo gala wuxuu ka yimaadaa dalalka deriska gaar ahaan wadamada Kenya iyo Ethiopia.
GAROWE ONLINE
