Doorasho ka dhaceysa Muqdisho xilli uu is-qabqabsi jiro
-
WARIYAHA MUQDISHO GAROWE ONLINE
- Posted On 25-01-2022, 06:20AM
MUQDISHO, Soomaaliya – Doorashada 3 kursi oo Golaha Shacabka ah ayaa talaadada maanta ah lagu qabanayaa Dugsi tababarka Gen. Kaahiye ee magaaladda Muqdisho sida uu sheegay guddiga maamulka doorashada goboladda waqooyi Somaliland oo daadihinaya codayntaan.
Guddiga ayaa sheegay in Doorashada HOP#037, HOP#238 & HOP#244 la dhammeystiray dhammaan shuruudaha iyo habraaca loogu talagalay in laga hubiyo kahor inta aanay la qaban doorashada kuraasta Golaha Shacabka Baarlamaanka 11aad.
HOP#037, horay ugu fadhisay Huda Axmed Cali halka HOP#238 uu baarlamaankii 10 aad ku fadhiyay Ismaaciil Cabdiraxmaan Sheekh Bashiir iyo HOP#244 oo afartii sano ee la soo dhaafay uu ku fadhiyay Siciid Maxamed Maxamuud Xayd .
72-dii saac u dambeysay ayaa SEIT Somaliland ku howlanaa diiwaangelinta Ergada, xareyntooda iyo diyaarinta agabka muhiimka u ah qabsoomidda Doorashada kuraasta maanta lagu dooranayo Muqdisho.
Doorashadda socota iyo Xildhibaanada kusoo baxaya kuraasta waxay sawir fiican kaa siinaysaa mustaqbalka nooca Baarlamaanka Soomaaliya yeelan doonto iyo doorashadda Madaxweynaha, oo loolan loogu jiro.
Kala shakiga iyo is-aaminaad la’aanta ka dhex jirta Madaxda Maamulada iyo Madaxweynaha muddo xileedkiisu isaga oo dhamaadey xafiiska jooga ayaa sababtay in doorashada goobihii lagu qaban lahaa lagagala cararo, maadaama kooxda Farmaajo ay faragelin joogta ah ku -hayaan arimaha amniga maamulada qaar.
Qabsoomida coddeyntan ayaa kusoo aadaysa xilli mar kale ay kala jabeen garabyada kuraasta gobolada waqooyi iyadda oo dhinaca Cabdi Xaashi uu ku dhawaaqay in ay ka baxeen sababo ku aadan "boob iyo kufsi" ay sheegeen in uu hormuud u yahay xafiiska ra'iisul wasaare Rooble.
GAROWE ONLINE
