Dowladda oo ka dhabaysay hanjabaad ay horey u soo saartey

Wasiir ku xigeenka warfaafinta, Cabdiraxmaan Al Cadaala, ayaa sheegay in sharciga uu qabanayo cid kasta.

DHUUSAMAREEB, Galmudug - Dowladda Soomaaliya ayaa ficil u rogtay digniin horey ay ugu jeedisey odayaasha dhaqanka, taas oo ahayd in qofkii la macaamila Al-Shabaab uu iyaga la mid yahay, lalana tiigsanayo sharciga.

Haatan dowladda waxa ay xabsiga u taxaabtay dhawr oday dhaqameed oo ku sugan magaalada Cadaado, kuwaas oo maalin ka hor kasoo laabtay deegaanada ay Al-Shabaab ka taliso, lana soo galay heshiis.

Odayaashan oo warbaahinta la hadlay ayaa XUSAY in maleyshiyada ay ugu tageen in ay kasoo siidaayaan 70 rag ah oo ay muddo haysteen, taasina ay ku guuleysteen marka laga reebo labo nin oo dhintay, iyo labo kale oo maqan.

Wasiir ku xigeenka warfaafinta Cabdiraxmaan Al Caddaala ayaa farriin uu bartiisa Facebook soo dhigay ku sheegay in sharciga dowladda uu qabanayo cid kasta, go'aankana uu yahay kii ay horey dowladda u gaartay.

Ciidamada ayaa markiiba soo xirey odayaasha, iyada oo lasoo bandhigey sawirro muujinaya iyaga oo indhaha u xiranyahay, saarana gaadiidka ciidanka.

Maleyshiyadda Al-Shabaab oo wajahaya dagaalo culus ayaa isku dayaya in ay heshiisyo la galaan beelaha, kaas oo ay ku sheegeen in ay is badbaadiyaan, beeshana aysan usoo raacin ciidanka dowladda.

Soojeedin caynkaasi ah oo horey xoogaga gacansaarka la leh shabakadda Al-Qaacida u jeediyeen bulshadda Hiiraan, waxayna horseedday in guud ahaan gobolka Hiiraan laga saaro kooxdani oo hadda kusii haray meelo kooban.

GAROWE ONLINE