Dowladda Soomaaliya oo Abaabul Dagaal Ka Wada Shabeellaha Dhexe

JOWHAR - Ciidamada dowladda Soomaaliya oo kaashanaya Malleeshiyaadka deegaanka ayaa billowday olole ballaaran oo lagu qasbayo Al-Shabaab inay ka baxaan deegaannada ay weli ka taliyaan ee gobolka Shabeellaha Dhexe, sida ay sheegeen mas’uuliyiinta.

Diyaargarowgan ayaa kusoo beegmaya iyadoo dowladda federaalka Soomaaliya ay ku dhawaaqday wejiga cusub ee howlgalka guud ee dalka oo lagu beegsanayo kooxda Al-Qaacida la xiriirta ee Al-Shabaab. Wasiirka Gaashaandhigga, Axmed Macallin Fiqi, ayaa hoggaamiyay wafdi booqday deegaanka Xaaji Cali ee Shabeellaha Dhexe, halkaas oo uu ugu baaqay bulshada iyo ciidamada inay dadaalkooda sii xoojiyaan.

"Waqtigu waa mid ku habboon in aan midowno," ayuu Fiqi u sheegay dadka deegaanka, isagoo ku boorriyay inay la shaqeeyaan ciidamada dowladda si Al-Shabaab looga saaro gobolka. Wasiirku wuxuu sheegay in howlgalka ujeedkiisu yahay in aan kaliya la xakameynin dhulka, balse sidoo kale la keeno xasilooni waarta.

Gobolka Shabeellaha Dhexe ayaa ahaa bartilmaameedkii ugu horeeyay ee wejigii hore ee weerarka dowladda, kaas oo sababay in Al-Shabaab laga saaro magaalooyin badan. Si kastaba ha ahaatee, kooxda ayaa weli joogto deegaano dhowr ah, taasoo u suurta gelisay inay sii wadaan weerarada.

Ololahan cusub ayaa qayb ka ah ballanqaadkii Madaxweyne Xasan Sheekh Maxamuud ee ahaa inuu qaado "dagaal ba’an" oo ka dhan ah Al-Shabaab, kuwaas oo u dagaallamayay inay afgambiyaan dowladda federaalka Soomaaliya in ka badan 16 sano.

Dowladda Soomaaliya ayaa lagala wareegay sanadkan saddex degmo oo muhiim ah oo ka tirsan gobollada Shabeellaha Dhexe iyo Hiiraan, kuwaas oo gacanta u galay Al-Shabaab, taasoo muujinaysa khatarta kooxda ku hayso dalka, iyadoo Ciidamada xoogga aysan u muuqan inay yihiin kuwa kahor tagi kara.

GAROWE ONLINE