Dowladda Soomaaliya oo adkeysay mowqifkeeda ka dhanka ah Shabaab
-
WARIYAHA MUQDISHO GAROWE ONLINE
- Posted On 14-07-2024, 04:16PM
MUQDISHO, Soomaaliya - Wasiirka arrimaha dibadda Soomaaliya Axmed Macalin Fiqi ayaa sheegay in fikirka argagixisada ah ee kooxda Al-Shabaab uusan meelna uga jirin Soomaaliya oo nabad ah, maalmo kadib hadal kasoo yeeray lataliyihii hore ee amniga Soomaaliya oo ka faalloodey xiisadaha u dhaxeeya Soomaaliya iyo Itoobiya.
C/saciid Muuse Cali, Lataliyihii hore ee Amniga Qaranka ee Madaxweynihii hore Maxamed C/llaahi Farmaajo oo wareysi siiyay BBC Somali, ayaa sheegay in haddii dowladda Madaxweyne Xasan Sheekh aysan ka hortagi karin dhibaatooyinka soo noqnoqda ee Ra’iisul Wasaaraha Itoobiya Abiy Axmed uu ku hayo Madaxbanaanida Soomaaliya uu xukunka ku wareejiyay Al-Shabaab.
Wasiir Fiqi ayaa qoraal uu soo dhigay X (Twitter) ku sheegay in Al-Shabaab ay weli tahay Urur Argagixiso oo caalami ah oo loo aqoonsaday, taasoo khatar weyn ku ah Soomaaliya, gobolka iyo meelo ka baxsan. Wuxuu carrabka ku adkeeyay in fikirkooda ku dhisan colaadda iyo argagaxisada aysan meelna kaga jirin Soomaaliya oo nabad ah.
Xiriirka diblumaasiyadeed ee u dhaxeeya Itoobiya iyo Soomaaliya ayaa aad u xumaaday tan iyo 1-dii bishii Janaayo markaasoo Itoobiya ay heshiis is afgarad ah la saxiixatay maamulka Somaliland.
Heshiisku waxa uu u ogolaanayaa Itoobiya in ay marin ka hesho qeyb kamid ah badda Soomaaliya iyo saldhig milatari oo ay ku beddesho aqoonsiga Somaliland.
Dowladda Soomaaliya ayaa ku gacan seyrtay heshiiskaas, waxayna bishii April dalkeeda ka eriday safiirkii Itoobiya u fadhiyay Soomaaliya Muqtaar Maxamed, waxayna amar ku bixisay in la xiro qunsuliyada Itoobiya ee Somaliland iyo Puntland.
Somaliland waxay ka go'day Soomaaliya in ka badan 30 sano ka hor, balse Midowga Afrika (AU) iyo UN-ka midna uma aqoonsana inay tahay dal madax-bannaan. Tani waxay meesha ka saartey in dalalka caalamka ama kuwa dariska ah ay la macaamilaan maamulkan gooni isu-taagga ah ee fadhigiisu yahay magaaladda Hargeysa.
GAROWE ONLINE
