DP World: "Xiisadda Soomaaliya iyo Imaaraadka ma saameyn doonto shaqada dekedda Berbera"

ABU DHABI - Shirkadda DP World ee laga leeyahay dalka Imaaraadka Carabta ayaa shaacisay in shaqada ay ka hayso dekedda Berbera ay u socoto si caadi ah, iyadoo aan loo eegin go’aankii dhowaan ka soo baxay dowladda Federaalka Soomaaliya ee lagu baabi'iyay heshiisyadii labada dal.

DP World waxay sheegtay inay weli ka go’an tahay inay sii waddo horumarinta dekedda iyo adeegga ganacsi ee ay u hayso Somaliland iyo gobolka Geeska Afrika. Waxay kaloo xustay in arrimaha siyaasadda iyo diblamaasiyadda ay u xilsaaran yihiin madaxda labada dhinac, balse iyagu ay xoogga saarayaan oo kaliya dhanka hawlaha dekedda.

Xaaladdan ayaa timid ka dib markii dowladda Soomaaliya ay sheegtay shalay inay gebi ahaanba joojisay heshiiyadii difaaca, amniga iyo dekadaha ay kula jirtay Imaaraadka. Xiisadan ayaa salka ku haysa arrimo ka dhashay dagaalka ka socda dalka Yemen iyo xiriirka gaarka ah ee Imaaraadku la leeyahay Somaliland.

Imaaraadka ayaa lacag gaaraysa $442 milyan ku maalgaliyay dekedda Berbera, taas oo ah isha ugu weyn ee dhaqaalaha iyo mashaariicda ay shirkadda DP World ka fuliso gobolka.

GAROWE ONLINE