Duulimaadkii Madaxweyne Xasan Sheekh ee Mareykanka oo loo baajiyay - SABABTA

MUQDISHO, Soomaaliya — Safarkii Madaxweynaha Soomaaliya uu ku tegi lahaa magaalada New York ee dalka Mareykanka ayaa la baajiyay, kadib markii duulimaadkii uu ku tegi lahaa shirarka Golaha Ammaanka ee Qaramada Midoobay uu u baaqday cimilada oo xumaatay darteed.

Madaxweyne Xasan Sheekh ayaa qorshuhu ahaa inuu ka qayb galo fadhiyada muhiimka ah ee Golaha Ammaanka, balse saraakiisha madaxtooyada ayaa xaqiijiyay in badqabka duulimaadka ay caqabad ku noqotay hawada oo aan degganayn.

In kasta oo safarka madaxweynuhu baaqday, mas’uuliyiintu waxay caddeeyeen in arrintani aysan marnaba saameyn doonin guddoomnimada meertada ah ee Golaha Ammaanka ee ay Soomaaliya hayso.

Soomaaliya ayaa la wareegtay hoggaanka Golaha Ammaanka ee Qaramada Midoobay 1-dii bishii Janaayo, waxaana la sheegay inay sii socon doonto shaqada diblomaasiyadeed ee uu dalku ku hoggaaminayo guddigaas inta lagu guda jiro bishan.

Wafdiga Soomaaliya ee ku sugan xarunta Qaramada Midoobay ayaa la filayaa inay sii amba-qaadaan ajandayaasha u qorshaysan dalka inta ay dhiman tahay muddada guddoonka.

GAROWE ONLINE