Elon Musk oo ku baaqey in la Xiro Safiirka Soomaaliya ee Qaramada Midoobay Abuukar Baalle

NEW YORK — Aasaasaha SpaceX, Elon Musk, ayaa dalbaday in la xiro Wakiilka Joogtada ah ee Soomaaliya ee Qaramada Midoobay, Abukar Dahir Osman, isaga oo ku eedeeyay musuqmaasuq dhaqaale oo ka dhacay Mareykanka, sida uu sheegay warbixin ay soo saartay APA News.

Musk ayaa qoraalkan ku daabacay X (horey loogu yiqiin Twitter), isaga oo ka jawaabayay eedeymo sheegaya in Osman uu horey u lahaa shirkad caafimaad oo ay maalgelisay dowladda Mareykanka, taas oo lagu helay dembi musuqmaasuq Medicaid ah. Qoraalka ayaa sidoo kale sheegay in Osman uu ka shaqeyn jiray hay’ad dawladeed oo kormeerta barnaamijka Medicaid.

“Xiro,” ayuu Musk ku qoray qoraalka, isaga oo tilmaamaya eedeymahaas.

Abukar Dahir Osman ayaa la wareegay madaxtinimada wareegta ah ee Golaha Ammaanka ee Qaramada Midoobay 1-da Janaayo 2026. Soomaaliya waxay ka mid tahay xubnaha aan joogtada ahayn ee Golaha ee xilliga 2025–2026.

Dalabka Musk ayaa sii kordhinaya kormeerka iyo feejignaanta lagu hayo wakiilka, xilli Soomaaliya ay hormuud ka tahay doodo muhiim ah oo Golaha Ammaanka ka socda, oo ay ku jiraan doodaha ku saabsan sharciga caalamiga ah iyo nabadda iyo amniga dunida.

Illaa iyo hadda ma jiro wax jawaab rasmi ah oo ka soo baxay safaaradda Soomaaliya ee Qaramada Midoobay ama mas’uuliyiinta Mareykanka oo ku saabsan hadalka Musk.

— GAROWE ONLINE