Hal qof oo ku dhintay qarax miino oo ka dhacay magaalada Baraawe

Baraawe, Shabeellaha Hoose – Ugu yaraan hal qof ayaa ku dhintay, dhowr kalena, oo ay ku jiraan askari, ayaa ku dhaawacmay kadib markii miino la dhigay ay ku qaraxday bartamaha magaalada Baraawe galabnimadii Axadda.

Qaraxa ayaa dhacay xilli ciidammada ammaanku ay ku soo laabanayeen kormeer howleed caadi ah. Goobjoogayaal ayaa sheegay in qaraxu uu ahaa mid xooggan oo laga maqlay qaybo badan oo magaalada ka tirsan.

Wararka hordhaca ah ayaa tilmaamaya in qaraxu uu dhacay xilli Taliyaha Ciidanka Xoogga Dalka Soomaaliyeed, Jeneraal Odowaa Yuusuf Raage, uu ku sugnaa magaalada Baraawe, halkaas oo uu xarigga ka jarayay xarunta cusub ee taliska guutada 6-aad ee ciidanka.

Saraakiisha ammaanka ayaa bilaabay baaritaan ku saabsan cidda ka dambeysay qaraxa, lamana oga ilaa hadda koox mas’uuliyad ka sheegatay weerarka.Baraawe ayaa muddooyinkii dambe ahayd magaalo muhiim ah oo ay ciidamada dowladda iyo kuwa ATMIS ay si dhow u maamulaan

Baraawe ayaa muddooyinkii dambe ahayd magaalo muhiim ah oo ay ciidamada dowladda iyo kuwa ATMIS ay si dhow u maamulaan, hase yeeshee weerarro noocan oo kale ah ayaa mararka qaar ka dhaca magaalada iyo deegaannada ku dhow.

GAROWE ONLINE