Itoobiya oo Dibloomaasi Taageeray Gooni-u-goosadka Somaliland safiir ugu soo magacowday Soomaaliya

Muqdisho, Agoosto 6, 2025 – Dowlada Itoobiya ayaa u dirtay Soomaaliya safiir cusub oo lagu magacaabo Suleiman Dedefo, kaas oo horey u muujiyay taageerada uu u hayo gooni-u-goosadka Somaliland, kadib markii si rasmi ah loogu soo dhaweeyay Madaxtooyada Villa Somalia uu ku qaabilay Madaxweynaha Soomaaliya Xasan Sheekh Maxamuud maalintii shalay.

Suleiman Dedefo ayaa dhowr jeer lagu arkay baraha bulshada isagoo diidan midnimada Soomaaliya, isla markaana ku baaqaya in la aqoonsado Somaliland — oo muddo soddon sano ka badan raadineysay aqoonsi caalami ah, gaar ahaan Golaha Ammaanka ee Qaramada Midoobay.

Bayaanka uu ku qoray barta X (hore Twitter), Dedefo wuxuu sheegay in kulankiisa uu la yeeshay Madaxweyne Xasan Sheekh uu diiradda saaray “xoojinta xiriirka diblomaasiyadeed, kobcinta iskaashiga dhaqaale iyo horumarinta amniga.” Hadalkan ayaa si weyn uga duwan hadalladii hore ee uu ku dhaliilayay dowladda federaalka Soomaaliya.

Sanadkii hore, Dedefo ayaa dowladda Soomaaliya ku tilmaamay “budhcad hawada ah” iyo “koox masuuliyad-darro ah,” isagoo ka hadlayay murankii cirka ee u dhaxeeyay Muqdisho iyo Somaliland, muran xilli xasaasi ah dhacay oo sababay in ay dhowr daqiiqo u jirsato in diyaaradaha Itoobiya iyo Qatar ay is galaan.

Intii badan ee 2024, dowladda Soomaaliya ayaa si cad u eedeysay Itoobiya inay wax u dhimayso madax-bannaanida dhuleed iyo midnimada dalka, taasoo dhalisay xiisad diblomaasiyadeed oo u baahatay in Turkigu dhex-dhexaadiyo si loo xalliyo khilaafka.

Itoobiya ayaa sidoo kale muujisay damac ah inay aqoonsato Somaliland, si ay u hesho marin xeebeed dhan 20 kiiloomitir oo ay ku dhistaan saldhig milatari iyo deked — taas oo dhalisay jawaab kulul oo uga timid Muqdisho, taasoo ay ku wargelisay in safiirkeedii kala baxday magaalada Addis Ababa.

Lama oga in safiirka cusub ee Itoobiya loo soo magacaabay Soomaaliya lasoo marsiiyay hannaan hubin siyaasadeed, maadaama uu leeyahay taariikh muran dhalisay. Si kastaba ha ahaatee, Itoobiya ayaa weli ah lamaane muhiim u ah Soomaaliya dhanka amniga iyo horumarka, iyadoo dalka ku leedahay in ka badan 4,000 oo askari oo qeyb ka ah howlgalka Midowga Afrika ee taageerada iyo xasilinta Soomaaliya (AUSSOM).

GAROWE ONLINE