Jarmalka oo lacag ugu deeqay dalal ay ku jirto Soomaaliya

Qaramada Midoobay ayaa ku qiyaastay in ku dhawaad 13 milyan oo qof ay halis ugu jiraan gaajo.

BERLIN, Germany – Dowladda Jarmalka ayaa 20 milyan oo Yuuro ugu deeqday wadamada Soomaaliya, Itoobiya iyo Kenya si loo yareeyo dhibaatada ka dhalatay abaarta ba’an ee ka jirta qaybo ka mid ah gobolka geeska Afrika oo markii horaba amni daro la daalla dhacayay.

Jarmalka ayaa Hay’adda Cunnada iyo Beeraha ee Qaramada Midoobay (FAO) ku wareejinaya 20 milyan oo Yuuro si loo hubiyo in dadka ku nool meelaha ay khatarta gaarka ah ay heli karaan gargaar degdeg ah.

Lacagahan ayaa waxaa ka mid ah, in in ka badan 50,000 oo qof oo Soomaaliya ku nool lagu siiyo quud ay xoolahooda siiyaan. Itoobiya, 26 godad oo xaalad adag ku jira ayaa la doonayaa in lagu soo celiyo. Dalka Kenya, 15,000 oo qoys ayaa lagu wadaa inay helaan lacag caddaan ah oo bini'aadantinimo. Qaybo ka mid ah saddexda waddan, roobabku waxay hoos u dhaceen ilaa 70 boqolkiiba. Gobollada qaar ayaa xitaa wax roob ah ka di’in.

Qaramada Midoobay ayaa ku qiyaastay in ku dhawaad 13 milyan oo qof ay halis ugu jiraan gaajo. Itoobiya ayaa waxaa ka jirta abaar daba dheeraatay ka dib markii saddex xilli roobaad oo xiriir ah ay baaqdeen tan iyo dabayaaqadii 2020-kii taasoo saameysay 6.8 milyan oo qof oo ku nool Oromiya, SNNP, Koonfur-galbeed iyo dowlad deegaanka Soomaalida, deegaanno dhowr ah oo ku yaalla koonfurta iyo Koonfur-bari ee Itoobiya.

Dadka ku nool isla deegaanadan ayaa si dirqi ah uga soo kabsaday abaartii ba’need ee dhacday sanadkii 2017 si ay mar kale u arkaan xaalado adag oo sidan oo kale ah, kuwaas oo calaamadihii ugu horeeyay ay soo shaac baxeen dhamaadkii sanadka 2020-ka .

Soomaaliya, qiyaastii 1.4 milyan oo qof ayaa laga yaabaa in ay ku barokacaan xaaladda hadda jirta awgeed. abaar iyo 7.7 milyan oo ah kala bar dadka ayaa u baahan gargaar bini'aadantinimo. Wax roobab ah ayaan ka di’in dhowr gobol oo Geeska Afrika ah tan iyo dabayaaqadii 2020-ka.

Xoolo dhaqatada reer guuraaga ah ayaa wajahaya dhibaatooyin isa soo taraya. Qoysas aan tiro lahayn ayaa lumiyay isha dhaqaale ee haysteen. Cawaaqib xumadii ka dhalatay iskahorimaadyadii hubeysnaa ee ka dhacay Itoobiya iyo Soomaaliya iyo weliba Ayaxa ka dilaacay Kenya ayaa sii hurinaya dhibaatada gobolka ka jirta.

"Ujeeddadeedu waa in la bixiyo macaawimo sida ugu dhakhsaha badan iyo sida ugu macquulsan si looga fogaado ama loo yareeyo dhibaatada. Dowladda Jarmalka ayaa dhowrkii sano ee la soo dhaafay ballaarisay gargaarka bini’aadantinimo ee Afrika. Sannadkii 2021-kii, waxa ay diyaarisay lacag dhan 564 milyan oo Yuuro si loogu caawiyo qaaradda Afrika," ayaa lagu yiri bayaan ka soo baxay safaaradda Jarmalka ee Addis Ababa.

GAROWE ONLINE