Jubaland oo Beenisay Eedeymaha DFS ee Ku Saabsan Joogitaanka Ciidamadeeda Gudaha Kenya

Image

KISMAAYO, Somalia - Dowlad-goboleedka Jubaland ayaa si cad u beenisay eedeymo la xiriira in ciidamadeedu ay ku sugan yihiin deegaanka Border Point One ee gobolka Mandera ee dalka Kenya, kaddib mudaharaadyo ay dadka deegaanka dhigeen maalmo kahor, kuwaasoo dalbanayay in laga saaro ciidamadaas dhulka Kenya.

Madaxweyne ku-xigeenka Jubaland, Maxamed Sayiid, oo la hadlay BBC-da ayaa sheegay in ciidamadoodu ay ku sugan yihiin meel u dhow xadka, balse aysan gudaha u gelin dhulka Kenya. Wuxuu xusay in ay ixtiraamayaan xadka iyo madax-bannaanida waddanka deriska ah.

Dhanka kale, magaalada Beled-Xaawo oo dhawaan la wareegeen Ciidanka Xoogga Dalka Soomaaliyeed kaddib dagaal socday muddo todobaad ah, ayaa sababtay barakaca boqolaal qof. Qaar badan oo ka mid ah dadkaas ayaa u qaxay magaalada Mandera ee dhanka Kenya si ay u helaan badbaado iyo gargaar.

Xaaladda guud ee xuduudda ayaa weli ah mid kacsan, iyadoo weli laga baqdin qabo in xiisadda ay sii fido. Dowladda Federaalka iyo maamulka Jubaland ayaa lagu cadaadinayaa in ay si degdeg ah xal uga gaaraan arrimaha taagan.

Warar ayaa sheegaya in Ciidamada Itoobiya ay ku amreen Cabdirashiid Janan, oo ah taliyaha cusub ee sirdoonka Gobolka Gedo inuu ka baxo Beled-Xaawo, islamarkaana ku wareejiyo Jubaland. Inta badan degmooyinka gobolka waxaa ku sugan Ciidanka Jubaland.
 
Dowladda Soomaaliya ayaa doonaysa inay doorasho aan heshiis lagu ahayn ku qabato Gedo, iyadoo geysay Ciidamada diyaarado looga qaadey Muqdisho, kuwaasoo colaad ka abuuray magaalooyin xasilooni iyo maamul maxali ah ka jiray.

GAROWE ONLINE

Related Articles

Muxuu ku saabsan yahay Heshiiska cusub ee Jabuuti la gashay dowladda Soomaaliya?

Soomaaliya iyo Jabuuti ayaa leh xiriir taariikhi ah oo ku saleysan hiddo, dhaqan iyo dano dhaqaale oo ay wadaagaan.

  • Soomaliya

    31-08-2025

  • 08:51AM

Masar oo caqabado kala kulmaysa Ciidamada ay usoo dirayso Soomaaliya

Kulanka oo ka dhacay xarunta wasaaradda ayaa ujeedkiisu ahaa in lagu xoojiyo xiriirka difaaca ee Soomaaliya iyo Masar.

  • Soomaliya

    31-08-2025

  • 08:18AM