Khasaaro ka dhashay qaraxyo ka dhacay magaalada Baardheere

Qaraxa koowaad ayaa lagu weeraray Xarunta ADC, iyadoo dadkii goobta isugu soo baxayna uu haleelay qarax labaad.

MUQDISHO, Soomaaliya - Khasaara isugu jira dhimasho iyo dhaawac ah ayaa ka dhashay weerar Al-Shabaab ay ku qaadeen xarun ciidan oo ku taal magaalada Baardheere.

Ilaa hadda, dadka deegaanka ayaa maqlay laba qarax oo lala beegsaday "Xarunta ADC" halkaas oo la aaminsan yahay inay degan yihiin ciidamadda Itoobiya.

Qaraxa koowaad ayaa lagu weeraray Xarunta, iyadoo dadkii goobta isugu soo baxayna uu haleelay qarax 2-aad, waxaana halkaas ka dhashay dhimasho iyo dhaawac.

Al-Shabaab ayaa sheegatay mas’uuliyadda weeraradaasi. Kooxda ayaa sidoo kale sheegtay in laba qarax oo ismiidaamin ah ay la beegsadeen saldhigga ciidamada Itoobiya ee Baardheere.

Ciidamada Itoobiya ee taageeraya dowladda Soomaaliya ayaa saldhig ku leh magaalada. Cutubyadan waxay isugu jiraan kuwa ka tirsan taliska ATMIS iyo kuwa aan kamid ahayn.

Illaa haatan, ma jiro wax war ah oo weerarkan ay kasoo saareen laamaha ammaanka Jubaland kuwaas oo uu hoostago gobolka wallow uu is-maan-dhaaf ka taagan yahay.

Weerarkan ayaa waxa uu kusoo beegmayaa iyadda oo magaaladda Baardheere ay ka jiraan xasarado siyaasadeed kuwaas oo salka ku haya khilaafka qadiyadda gobolka Gedo.

GAROWE ONLINE