Khilaaf siyaasadeed iyo mudaaharaadyo ka socda Kenya

NAIROBI, Kenya - Dalka Kenya ayaa waxaa maalmihii la soo dhaafay ka dhacayay dibadbaxyo waaweyn oo ay soo abaabuleen mucaaradka Kenya, kuwaas oo qalalaase isu rogey markii dambe.

Shacabka ayaa wadooyinka isugu soo baxay si ay u muujiyaan dareenkooda ku aadan sharciga maaliyadda ee dowladdu soo saartay.

Sharciga ayaa soo rogay canshuuro cusub, wuxuuna joojiyay kabkii dawladda, taasoo uga sii dartay shacabaka dhibaatada sicir bararka ee dalka ka jirtay.

Canshuurahan cusub ayaa sare u qaaday maciishada, gaar ahaan qiimaha shidaalka, taasoo wax ka bedeshay nolosha dadka oo hadda la daalaa dhacaya nolol maalmeedkooda.

Sababaha ugu weyn ee banaanbaxan ayaa sidoo kale ah in mucaaradka ay aaminsan yihiin in doorashadii sanadkii hore lagu shubtay, taasi oo keentay kalsooni darro baahsan oo ay ka qabaan dowladda hadda jirta.

Madaxweyne William Ruto ayaa si adag uga soo horjeestay dibadbaxyadan, taasoo keentay in ay isku dhacaan banaanbaxayaasha iyo booliiska Kenya oo rasaas ku furay.

Dibadbaxa inta uu socday ayey xaaladdu cirka isku shareertay, waxaana la xiray goobihii ganacsiga iyo iskuullada.

Waxa sidoo kale xabsiga loo taxaabay madaxdii mucaaradka, taas oo sii kordhisay xiisadda ka dhex oogan xukuumadda iyo kuwa ka soo horjeeda.

Baaqyo wada hadal ah oo u dhexeeya dowladda iyo mucaaradka ayaa ka soo baxay dhinacyo kala duwan, sida culumaa’udiinka iyo ergooyin caalami ah.

Hey'ada Xuquuqul Insaanka ee Human Rights Watch ayaa ugu baaqday madaxda Kenya inay joojiyaan ku sifaynta mudaaharaadayaasha "argagixiso" iyo inay ixtiraamaan xuquuqda isu imaatinka nabdoon.

Xeeldheerayaasha ayaa rumeysan in xal u helida dhibaatada ka taagan Kenya ay ku qotomaan in wax laga qabto cabashooyinka mucaaradka iyo in la helo mawqif midaysan oo ku saabsan arrimaha maaliyadda, taasoo dhabaha u xaari kartaa Kenya oo mideysan.

GAROWE ONLINE