Lataliyaha amniga qaranka oo beeniyay warar laga faafiyey
-
WARIYAHA MUQDISHO GAROWE ONLINE
- Posted On 05-06-2022, 03:12PM
MUQDISHO, Soomaaliya - Lataliyaha dhanka amniga qaranka ee madaxweynaha Soomaaliya Xuseen Macalin Maxmuud ayaa beeniyay wararka sheegaya inuu Jabuuti kulan kula qaatay saraakiil ka tirsan TPLF.
Wararkan "aan sal iyo raad toona lahayn" ayaa Jimcaha todobaadkii hore si weyn ugu baahay baraha bulshadda gaar ahaan mareegga Twitter-ka oo siyaasadda si weyn loogu qaadaadhigo.
"Fadlan ka digtoonow wararka been abuurka ah ee lagu faafinayo shabakadaha: Ma aan safrin meel ka baxsan Muqdisho tan iyo markii la ii magacaabay La-taliyaha Amniga Qaranka ee Madaxweynaha Jamhuuriyadda Federaalka Soomaaliya," ayuu Xuseen qoray.
Cali ayaa sidoo kale la-taliyaha dhanka amniga u ahaa Madaxweyne Maxamuud muddo xileedkiisii koowaad iyo madaxa amniga dibadda ee Hay’adda Sirdoonka iyo Nabadsugidda Qaranka Soomaaliyeed ee NISA.
Sidoo kale, waa aas-aasaha Machadka ka faaloodda arrimaha ammaanka ee Hiraal kaasoo fadhigiisu yahay caasimadda Muqdisho waxaana uu soo saaraa warbixino joogto ah oo lagu falanqeeyo xaaladda waddanka.
Waa kuma Xuseen Macalin Maxamuud?
Xuseen ayaa haysta shahaadada Bachelor ee Taariikhda iyo shahaadada Master-ka ee Amniga iyo Sirdoonka. Waxa uu hormuud ka ahaa abuurista Xarunta Warbixinta Maaliyada ee Financial Reporting Center (FRC).
Muddo 4 sano ka badan ayuu ahaa Agaasimaha Waaxda Amniga Dibadda ee Hay'ada Nabadsugida & Sirdoonka Qaranka (NISA) kahor inta uusan kusoo biirin Madaxtooyadda.
La-dagaallanka Argagaxisada, Burcad-badeedda, Lid-xuuraanka iyo xiriirka hay'adaha caalamiga ee ka howlgala Soomaaliya ayuu si weyn ugu dhex-jiray dhowrkii sano ee lasoo dhaafay.
Ku-xigeenka Agaasimaha Guud ee Hay'ada Nabadsugida & Sirdoonka Qaranka Soomaaliyeed ayuu mar noqdey. Sidoo kale, Cali ayaa horey u soo noqday Lataliyaha Amniga Qaranka ee Madaxweynihii 9-aad iyo 8aad.
Xubin ka tirsan Golaha Amniga Qaranka ayuu noqdey. Waa qoraagga Istraatejiyada La dagaalanka Argagaxisada Soomaaliya iyo Istraatejiyada iyo siyaasada dalka ee dib-u-heshiisiinta iyo cafiska loo fidiyo Al-Shabaab.
GAROWE ONLINE
