Maamulka Xasan Sheekh oo ku hungoobay qorshe uu waqti geliyey

Villa Soomaaliya ayaa ololahan waxay u cuksaneysay dagaalka ka dhanka ah Al-Shabaab.

WASHINGTON, USA - Golaha Ammaanka ee Jamciyadda Qurumaha Ka Dhaxeysa ayaa Khamiistii todobaadkan si aqlabiyad leh ugu codeeyay in la sii wado cunaqabateynta dhinaca hubka ee saaran Soomaaliya.

Maamulka Xasan Sheekh ayaa waqti badan geliyey sidii kalkan golaha uu xayiraadan uga qaadi lahaa hase ahaatee waxaa muuqanaysa in uu ku hungoobay dadaalkan qeybta ka ahaa safaradiisa u dambeeyay.

Arrimaha ay Villa Soomaaliya qiilka uga dhiganaysay in xayiraada laga qaado waxaa kamid ah in dalka uu ku jiro dagaal iyo in ay sii kordheyso khatarta maleyshiyaadka Al-Shabaab.

Tobban dal oo ay hogaaminayaan Mareykanka, Ingiriiska, Imaaraadka, iyo Kenya ayaa taageeray in cunoqabateynta ay sii socoto, halka wadamadda Ruushka, Shiinaha, Gabon iyo Ghana ka aamuseen.

Qaraarka ay soo diyaarisay dowladda Ingiriiska ayaa wax ka beddelaya cunaqabataynta hubka si uu u muujiyo horumarka ay dawladdu ka samaysay hagaajinta maamulka hubka iyo rasaasta.

Tan waxaa ka mid ah in Soomaaliya loo ogolaado in ay la soo degto gantaalada hawada sare laga qaadi karo, hoobiye heersare ah, hubka hagta taangiyada, qaar ka mid ah diyaaradaha iyo madaafiicda loo qaabeeyey ama loo qaabeeyey in loo isticmaalo militariga, iyo la dagaalanka diyaaradaha aan duuliyaha lahayn.

Hase ahaatee, waxaa shuruud ah in Guddiga la socodka Golaha Ammaanka ay laga maarmaan tahay in ay la socdaan dhaqdhaqaaqa iyo soo dejinta dhamaan hubkan.

Safiirka Soomaaliya ee Qaramada Midoobay Abuukar Cismaan ayaa muujiyay sida ay uga xun yihiin kordhinta cunaqabateynta hubka, waxaana uu ku amaanay afarta dal ee ka aamusay in aysan taageerin.

Cismaan ayaa sheegay in Soomaaliya ay dhibane u tahay "kooxo argagixiso". Dadka ay waxyeeladda kasoo gaartey ayuu tibaaxay in ay si gaar ah u xanuun-jineyso sii jiritaanka cunoqabateynta.

Dowladda Soomaaliya ee uu hogaamiyo Xasan Sheekh Maxamuud ayaa qaaday weeraro cusub oo ka dhan ah ururka Al-Shabaab, waxaana ka mid ah dadaallo lagu doonayo in lagu soo afjaro shabakadaha dhaqaalaha.

GAROWE ONLINE