Maareeye: DF diyaar bay u tahay inay la hadasho Somaliland
-
- Posted On 07-03-2015, 04:59PM
March 7, 2015 (GO)- Kaddib markii todobaadkii hore uu fashilmey wadahadalkii ergooyinka Dowladda Federaalka iyo Somaliland ku dhex mari lahaa magaalada Istanbul, ayaa waxaa War-saxaafadeed kasoo baxay Wasaaradda Warfaafinta lagu sheegay in Dolwadda Federaalku diyaar u tahay in lasii wado wadaxaajoodka.
War-saxaafadeedka waxaa sidoo kale lagu sheegay inay nasiib darro ahayd wafdiga Somaliland inay shirka qaaddacaan, arintaasoo ah mid wax u dhimi karta heshiisyadii labada dhinac horay u gaareen.
"Dowladda Federaalka iyada oo mar walba u taagan midnimada Soomaaliya, waxay caddeyneysaa in ay diyaar u tahay wada hadal shuruud la’aan ah oo dan u ah Midnimada iyo horumarinta shacabka Soomaaliyeed oo fool-ka-fool la isu soo hor fariisto" ayuu yiri.
Shirkii Istanbul oo qorshuhu ahaa inuu furmo 28-da bishii hore ee February, waxaa ajandeyaasha lagu gorfeyn lahaa ka mid ah arrimo xasaasi oo ay ugu muhiimsan tahay sida laga yeelayo midnimada iyo qadiyadda gooni isu-taagga Somaliland.
Ergooyinka labada dhinac ayaa ku guul dareystey inay isa soo hor fariistaan, kadib markii Somaliland shardi ka dhigtey in ergada Dowladda Federaalka laga saaro xubno -sida Somaliland ku doodeyso- deegaan ahaan kasoo jeeda dhulkeeda arrintaasoo wafdiga Dowladda Federaalku ka biyo diideen.
GAROWE ONLINE
