Madaxweyne Xasan Sheekh oo ka hadlay Muddo kororsiga lagu eedeeyay

Muqdisho – Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, ayaa markale ku celiyay mowqifkiisa adag ee ku aaddan qabsoomidda doorashada dalka xilligeeda, isaga oo sheegay inuusan waligiis taageerin muddo kororsi iyo in uu kursiga si sharci-darro ah ugu dheeraado.

Isagoo ka hadlayay arrimaha doorashooyinka, Madaxweyne Xasan Sheekh ayaa yiri:  “Waxaan aaminsanahay in waqtiga noo haray doorashada lagu qaban karo, kharashka doorashadana dowladda Soomaaliya ayaa bixin doonta. Mowqifkeygu waa la garanayaa – waligey muddo kororsi ma ogolaan.”

Madaxweynaha ayaa sidoo kale sheegay inuusan wax welwel ah ka qabin in xafiiska laga guuleysto, isaga oo tusaale usoo qaatay doorashadii hore ee uu ku guuldareystay.

“Habeenkii doorashadii hore la iiga guuleystay anigoo qoslaya ayaan hoolka ka soo baxay. Hadda haddii doorashada la iiga adkaado waxba igama gelin. Waxa kaliya oo aan doonayaa waa in dalkani maro waddo sax ah oo xasilloon.” ayuu yiri.

Hadalkan ayaa imanaya xilli ay dalka ka taagan tahay dood siyaasadeed oo ku saabsan waqtiga doorashada soo socota iyo hufnaanta hannaanka doorasho ee loo marayo. Waxaa sidoo kale jirta cabsi laga qabo in dib-u-dhac ku yimaado doorashooyinka, taasoo dhalisay walaac ay muujiyeen mucaaradka iyo qaar ka mid ah bulshada rayidka ah.

Madaxweyne Xasan Sheekh ayaa hadalkiisa ku soo xiray isagoo ku celiyay in ay ka go’an tahay in la ilaaliyo dastuurka iyo hannaanka dimoqraadiyadda: “Waa in aan muujinnaa kalsooni, hufnaan iyo ixtiraamka nidaamka dowliga ah. Haddii aan ku guuldareysto doorashada, diyaar ayaan u ahay in aan si sharaf leh xilka u wareejiyo.”

GAROWE ONINE