Madaxweyneyaasha Soomaaliya iyo Masar oo kulmey
-
- Posted On 16-03-2015, 07:39AM
March 16, 2015 (GO)- Madaxweynaha Dowladda Federaalka Soomaaliya Xasan Sheekh Maxamuud ayaa magaalada Sharm El Sheikh kula kulmey dhiggiisa dalka Masar Cabdulfataax Al-sisi.
Kulanka labada Madaxweyne oo intiisa badan xog wareysi ahaa, waxaa muddadii uu socdey Madaxweynaha Soomaaliya ka warbixiyey xaaladda dalka Soomaaliya ku jiro, dadaallada nabadeynta ee socda iyo higsiga 2016.
Sidoo kale, Madaxweynaha Masar ayaa soo dhoweeyey horumarka Soomaaliya ka sameysey dhinacyada ammaanka iyo siyaasadda isagoo ballan qaadey in Dowladda Masar intii awoodeeda ah si joogto ah u taageeri doonto Soomaaliya.
Xasan Sheekh ayaa dalka Masar uga qayb galay shir muddo saddex maalmood ah soconayey oo ku saabsanaa horumarinta maalgashiga iyo dhaqaalaha Masar. Shirkaas waxaa kasoo qayb galay madax badan oo caalamka ah iyo tobannaan shirkadood oo kuwa maalgashiga ka shaqeeya ah.
Muddadii uu Madaxweynaha Soomaaliya dalka Masar ku sugnaa wuxuu la kulmey madax Carbeed badan iyo diblumaasiyiin kale oo ka socdey wadamada Maraykanka iyo Yurub.
GAROWE ONLINE
