Maraykanka oo hal shuruud ku xiray "aqoonsiga" Somaliland

Hadalka Safiirka Maraykanka ayaa yimid xilli Somaliland ay codsi u gudbisay. dowladda Maraykanka.

WASHINGTON, USA – Safiirka Mareykanka ee Soomaaliya, Larry Andre, ayaa mar kale sheegay in Mareykanku uu hal siyaasad ka haysto Soomaaliya, uuna aqoonsan yahay xuduudka la sameeyay xilligii xorriyadda isaga oo la hadlaayay jaaliyada Soomaaliyeed ee dalka Maraykanka.

Safiirka ayaa hadalkan ka sheegay munaasabad ka dhacday magaalada Minneapolis oo qeyb ka ah dabbaaldegga xuska xorriyadda Soomaaliya oo ay soo qabanqaabiyeen bulshada Soomaaliyeed ee ku nool dalka Maraykanka.

“Siyaasaddeenu waa mid la mid ah 62-kii sannadood ee u dambeeyay, oo ah Soomaaliya taariikhi ah, xuduudaheeda taariikhiga ah, tan iyo markii ay isku biireen waxii loo aqoon jiray British Somaliland iyo Italian Somaliland oo ay hal dal wada dhisteen,” ayuu yiri safiirka Maraykanka ee Soomaaliya.

Danjire Andre waxa uu sheegay in aqoonsiga wada-hadallada maqaamka madax-bannaanida ay tahay in ay si gaar ah u go’aamiyaan Soomaaliya iyo Somaliland.

Danjiraha ayaa intaas ku daray in Mareykanka uu wax ka bedeli doono siyaasaddiisa Soomaaliya oo hal ah haddii labada dhinac ay ku heshiiyaan in xaalad isbedel ah la sameeyo.

Hadalka Safiirka Maraykanka ayaa yimid xilli Somaliland ay dowladda Maraykanka u gudbisay in loo ixtiraamo gooni isku taaggooda ay ku doonayaan in kaga go’aan Soomaali inteeda kale.

Dhawaan ayay markii guddi ka tirsan Koongareeska Mareykanka uu sare u qaaday sharci kor u qaadaya iskaashiga dhanka amniga ee Mareykanka uu la leeyahay gobolka ismaamula ee Somaliland ka dib markii dhowr isbedel oo ay ka codsadeen Maraykanka.

Gobolka ayaa ku guulaystay in uu qabto doorasho dadweyne oo ay goob-joogayaal caalami ah ka qayb galeen taas oo soo jiidatay indhaha caalamka. Somaliland waxay ku dhawaaqday in ay ka go'day Soomaaliya inteeda kale sanadkii 1991-dii inkastoo aysan helin aqoonsi caalami ah.

GAROWE ONLINE