Mareykanka oo bilaabaya gargaarka Soomaaliya kadib markii DFS mas’uuliyadda burburinta Bakhaarka WFP qaadatay

MUQDISHO, Soomaaliya – Dowladda Mareykanka ayaa ku dhawaaqday in ay dib u bilaabi doonto qaybinta cuntada Barnaamijka Cuntada Adduunka (WFP) ee Soomaaliya, ka dib markii Dowladda Federaalka ay qiratay saameynta tallaabooyinkeeda ee carqaladeeyay howlaha gargaarka, oo ay ku jiraan kaalmooyinka ay maalgeliso Washington.

Dowladda Soomaaliya ayaa xaqiijisay in dhammaan alaabta WFP ee saameynta ku yeelatay balaadhinta dekadda Muqdisho dib loo soo celiyay. Wasaaradda Arrimaha Dibadda ayaa sheegtay inay qaadatay mas’uuliyadda “xallinta xaaladdan nasiib-darro ah” isla markaana ay ka xuntahay in ay dhacday.

Sida lagu sheegay bayaanka, si loo hubiyo in gargaarka bani’aadamnimo uu sii socdo, si nabad ahna loo gaarsiiyo, dowladda ayaa WFP siisay bakhaar cusub oo ka weyn oo ku habboon gudaha dekadda Muqdisho, kaasoo kor u qaadaya awoodda kaydinta iyo qaybinta cuntada si hufan.

U.S. Foreign Assistance ayaa bayaankeeda ku sheegtay: “Mareykanka ayaa aqoonsaday Dowladda Federaalka Soomaaliya ee qaadatay mas’uuliyadda tallaabooyinkeeda ee saameeyay howlaha Barnaamijka Cuntada Adduunka (WFP), oo ay ku jiraan kaalmooyinka ay Mareykanku maalgeliso.

Ka dib bayaankan, waxaan dib u bilaabi doonaa qaybinta cuntada WFP, iyadoo weli la sii wadi doono dib-u-eegista kaalmooyinka kale ee aan siinno Soomaaliya. Xukuumadda Trump waxay leedahay siyaasad eber dulqaad ah oo ku saabsan khasaaro, xatooyo, ama u leexinta kheyraadka Mareykanka.”

Bayaankan Mareykanka ayaa imaanaya ka dib markii maamulka Mareykanku uu hakiyay kaalmooyinka, isagoo ku eedeeyay saraakiisha Soomaaliya inay burburiyeen bakhaar WFP oo Mareykanku maalgeliyay isla markaana ay si sharci-darro ah u qabsadeen 76 tan oo cunto ah oo loogu talagalay dadka nugul.

Soomaaliya ayaa wajahaysa xaalad bani’aadamnimo oo sii xumaaneysa, oo ay sababaan abaaro muddo dheer socday, colaado, iyo cudurro soo noqnoqda. Qiyaasaha Qaramada Midoobay ayaa muujinaya in 2026 ay 4.8 milyan oo qof u baahan doonaan gargaarka bani’aadamnimo, hoos u dhac 20% ah marka loo eego 2025-ta, taasoo ka tarjumaysa shuruudaha baahida oo adag, balse aanay xaaladdu ka fiicnayn.

Soomaaliya, Qaramada Midoobay, iyo la-hawlgalayaasha gargaarka ayaa Isniintii soo bandhigay Qorshaha Baahiyaha Bani’aadamnimo 2026, oo lagu doonayo $852 milyan si loo caawiyo 2.4 milyan oo qof oo u baahan gargaarka badbaadinta nolosha iyo ilaalinta.

GAROWE ONLINE