Masar oo caqabado kala kulmaysa Ciidamada ay usoo dirayso Soomaaliya

MUQDISHO, Soomaaliya — Wasaaradda Gaashaandhigga Soomaaliya ayaa marti gelisay kulan heer sare ah oo dhexmaray saraakiil ka tirsan dowladda Soomaaliya iyo Taliyaha Difaaca ee Safaaradda Masar, Kornayl Axmed Fathi Cabdelsatar Al-Xusayni, kaasoo lagu gorfeeyay iskaashi milatari oo laba geesood ah.

Kulanka oo ka dhacay xarunta wasaaradda ayaa ujeedkiisu ahaa in lagu xoojiyo xiriirka difaaca ee Soomaaliya iyo Masar, iyadoo si gaar ah diiradda loo saaray qorshaha ay Masar uga qaybqaadaneyso howlgalka Midowga Afrika ee AUSSOM iyo tababarro cusub oo loo sameynayo ciidanka Xoogga Dalka Soomaaliyeed.

Sida laga soo xigtay saraakiil ka tirsan wasaaradda, labada dhinac ayaa isla gartay in la dardargeliyo is-weydaarsiga khibradda iyo aqoonta ciidan, iyada oo la eegayo baahiyaha degdegga ah ee dhanka sugidda amniga gudaha.

“Kulankani wuxuu calaamad u yahay diblomaasiyad milatari oo sii kobcaysa, waxaana Masar ay muujisay doonis dhab ah oo ah in ay si toos ah uga qeybqaadato nabadeynta Soomaaliya,” ayuu yiri sarkaal ka tirsan taliska Xoogga Dalka oo la hadlay warbaahinta gudaha.

Masar ayaa la filayaa in dhawaan ay qeyb muhiim ah ka noqoto AUSSOM, iyadoo la rumeysan yahay in ciidamo tababaran ay ka mid noqon doonaan cutubyada ka howlgali doona gobollada ay Al-Shabaab wali ku sugan tahay.

Mas’uuliyiinta Soomaaliya ayaa rajo wanaagsan ka muujiyay kaalinta Masar, iyagoo ku tilmaamay talaabo la taaban karo oo gacan ka geysan karta adkeynta xasilloonida dalka iyo gobolka Geeska Afrika guud ahaan.

GAROWE ONLINE