Maxay Soomaaliya uga hartay tartanka Guddoomiyaha Guddiga Midawga Afrika?

MUQDISHO, Soomaaliya - Fawziya Yusuf Adam, Wasiirkii hore ee Arrimaha Dibadda Soomaaliya, ayaa ka hartay tartanka Guddoomiyaha Guddiga Midowga Afrika, iyadoo soo afjartay ololihii ay kawaday dalalka saaxiibka la ah.

Ilo-wareedyo kala duwan ayaa Garowe Online xaqiijiyay in Fawzia Yuusuf tartanka uga hartay sababo la xiriira loolan adag oo kaga imaanaya Kenya, oo Raila Odinga u tartamaya iyo Jabuuti oo wasiirkeeda arrimaha dibadda Maxamed Yuusuf uu ka mid yahay musharaxiinta.

6-da bisha August ayay ahayd markii ay ku ekeyd in musharaxiinta ay soo gudbiyaan araajidooda balse Fowsiya Yuusuf ayaa la sheegay in ay ka hartay tartanka. Waxaa sidoo kale jira musharixiin ka soo jeeda Mauritius iyo Madagascar, kuwaas oo u tartamaya kursiga saameynta badan ee qaarada.

Labo bilood ka hor, Fowsiya waxay sheegtay inay cadaadis kala kulmayso hoggaanka dowladda iyo kuwa Maamul Goboleedyada, kuwaasoo ka codsaday inay isaga harto tartanka. Ismaaciil Cumar Geelle oo u dhashay dalka Jabuuti ayaa la sheegay in uu Soomaaliya ka codsaday in ay ka noqoto tartanka.

“Dowladda iyo afar ka mid ah madaxda Maamul Goboleedyada ayaa igu amray inaan ka tanaasulo musharaxnimadayda, waxaan isku dayay inaan ku qanciyo muhiimadda uu leeyahay kursiga, balse waa ii suurta geli weyday, waxay isla garteen inaan kursiga ugu tanaasulo Jabuuti,” ayay ku tiri Fawsiya.

Sida ay sheegtay, 2016-kii, Madaxweyne Xasan Sheekh Maxamuud ayaa ka codsaday inay isaga harto tartanka, maadaama Kenya ay soo bandhigtay musharax. Aamina Maxamed oo u dhalatay dalka Kenya, oo markaas ahayd wasiirka arrimaha dibadda Kenya, ayaa la tartantay guddoomiyaha xisbiga AUC ee hadda Moussa Faki, balse guuldarro dirqi ah ayay ku adkaatay.

"Laba jeer ayaa la ii diiday guddoomiyenimada Midowga Afrika, ma garanayo inay tahay qof dumar ah ama sababo kale oo qarsoon," ayay tiri.

Go’aankeeda ah inay isaga tagto ayaa yimid kadib markii Raila Odinga uu xoojiyay ololihiisa, isagoo taageero muhiim ah ka helay ruug-caddaayada sida Yoweri Museveni ee Uganda iyo Paul Kagame ee Rwanda.

Dhawaan Raila waxa uu ka caawiyay madaxweyne William Ruto in uu soo dhiso dowlad ay ku mideysan yihiin midnimo qaran ka dib muddo bil ah oo ay mudaaharaadayeen dhalinyarada ku nool dalka Bariga Afrika.

GAROWE ONLINE