Meydka Danjire Yuusuf Bari-Bari oo berri Garowe lagu aasi doono
-
- Posted On 28-03-2015, 04:57PM
March 28, 2015 (GO)- Meydka -AHN- Yuusuf Ismaaciil Bari-Bari oo ahaa danjirihii Dowladda Soomaaliya u fadhiyey magaalada Geneva ee xarunta dalka Switzerland ayaa berri la keeni doonaa magaalada Garowe si aas qaran loogu sameeyo.
Ilo-wareedyo lagu kalsoon yahay ayaa warkan u xaqiijiyey Garowe Online, waxaana xilligan madaxtooyada Garowe ka socota qaban qaabo ku aaddan aaska, guddi wasiirro ah ayaana arintan loo saarey.
Yuusuf Bari Bari ayaa muddo dheer soo ahaa safiirka Soomaaliya u fadhiya xafiiska xuquuqul insaanka ee Qaramada Midoobey, xilkaasoo March 1, 2008 uu u magacaabay madaxweynihii hore ee Soomaaliya Cabdullaahi Yuusuf Axmed.
Wuxuu sidoo kale xubin kasoo ahaa ururkii SSDF isagoo mar loo magacaabey af-hayeenka ururka.
Geerida Yuusuf Bari-Bari waxaa ka tacsiyeeyey madaxda Dowladda Federaalka iyo madaxda Puntland.
GAROWE ONLINE
