Midowga Yurub oo bogaadiyay ku biirista mucaaradka wada-hadalka qaran

MUQDISHO, Soomaaliya – Ergeyga Midowga Yurub u qaabilsan Soomaaliya ayaa soo dhaweeyay go’aanka ay qaateen isbahaysiga ugu weyn ee mucaaradka dalka, kaas oo oggolaaday inuu ka qayb galo shir wadatashi ah oo ay hoggaaminayso Dowladda Federaalka Soomaaliya, iyadoo tallaabadaas lagu tilmaamay mid wax ku ool ah oo kor u qaadaysa xasilloonida dalka.

Golaha Mustaqbalka Soomaaliya, oo ay ku mideysan yihiin hoggaamiyeyaal goboleedyo iyo masuuliyiin hore, ayaa xaqiijiyay in xubnihiisu ay ka qayb geli doonaan shirka wadatashiga ee lagu wado in 1-da Febraayo 2026 lagu qabto magaalada Muqdisho. Casuumaadda shirka ayaa si rasmi ah uga timid Dowladda Federaalka Soomaaliya.

Safiirka Midowga Yurub ee Soomaaliya, Francesca Di Mauro, ayaa qoraal ay ku baahisay baraha bulshada ku sheegtay in goluhu aqbalay casuumaadda kaddib kulan ay yeesheen, iyadoo ku tilmaantay arrintaas “tallaabo togan oo wax dhisaysa.” Waxay intaas ku dartay in waxa hadda loo baahan yahay ay tahay jawi ku habboon oo suurtagelinaya wadahadallo miro-dhal ah oo u dhexeeya dhammaan dhinacyada siyaasadda.

Golaha Mustaqbalka Soomaaliya ayaa horay khilaaf ula lahaa dowladda federaalka, gaar ahaan qorshaha lagu doonayo in dalka loogu guuro nidaamka doorasho ee “hal qof, hal cod.”

Inkastoo ay aqbaleen ka qaybgalka shirka, goluhu wuxuu shuruud ka dhigay in la hakiyo dhammaan wax-ka-beddellada lagu sameynayo Dastuurka KMG ah ee 2012, si wada-hadalladu u noqdaan kuwo ku dhisan kalsooni isla markaana natiijo wax ku ool ah laga gaaro.

GAROWE ONLINE