Musharaxiinta Waqooyi Bari oo diiday hanaanka doorashada, kuna eedeeyay DFS faragelin

Laascaanood – Musharaxiinta madaxtinimada ee Maamul-goboleedka cusub ee Waqooyi Bari Soomaaliya ayaa si adag uga hor yimid habraaca doorashada la qorsheynayo in dhowaan ka dhacdo gobolka, iyagoo sheegay inay jirto faragelin ka socota Dowladda Federaalka Soomaaliya.

War-saxaafadeed ay si wadajir ah u soo saareen Axaddii, ayay musharaxiintu si kulul u dhaleeceeyeen Wasiirka Arrimaha Gudaha ee Federaalka, Cali Yuusuf Cali (Cali Xoosh), iyagoo ku eedeeyay inuu taageerayo koox gaar ah oo doonaysa inay si qasab ah u maamusho maamulka cusub.

Musharaxiintu waxay sheegeen in guddiga baaritaanka iyo ansixinta baarlamaanka ee uu magacaabay wasiirku uu yahay mid sharci-darro ah, isla markaana u adeega dano gaar ah, taasoo meesha ka saareysa kalsoonida shacabka ee geeddi-socodka doorashada.

Waxay ka digeen in haddii doorasho lagu galo iyadoo aan la helin is-afgarad ballaaran ay keeni karto kala qaybsanaan bulsho, dhaawacdo rajooyinka la xiriira dhismaha maamul hufan, isla markaana ay curyaamiso xaqa ay shacabka u leeyihiin inay si xor ah oo caddaalad ah u doortaan hoggaankooda.

Qoraalkooda waxay musharaxiintu si cad u muujiyeen inaysan aqbali doonin hannaan doorasho oo u janjeera shaqsi gaar ah. Waxay adkeeyeen in doorashadu ay waafaqdo dastuurka dalka, ayna noqoto mid ka tarjumeysa rabitaanka shacabka.

Sidoo kale, waxay ugu baaqeen odayaasha dhaqanka iyo hoggaamiyeyaasha bulshada inay door muuqda ka qaataan ilaalinta midnimada iyo nabadda gobolka.

Musharaxiintu waxay sidoo kale uga digeen Dowladda Federaalka in haddii ay sii waddo faragelinta doorashada, ay mas'uul ka noqon doonto cawaaqib kasta oo ka dhasha. Waxay ugu baaqeen beesha caalamka, shacabka Soomaaliyeed, iyo dhammaan daneeyeyaasha siyaasadeed inay diidaan hannaan kasta oo eex leh, isla markaana taageeraan doorashooyin hufan oo la isku halleyn karo.

Doorashada Maamul-goboleedka cusub ee Waqooyi Bari ayaa la filayaa inay dhacdo toddobaadyada soo socda, iyadoo rajada shacabka ee helitaanka hoggaan matala ay sii kordheyso.

GAROWE ONLINE