Nairobi oo lagu qabtay Bandhiga Dhaqanka, Fanka iyo Taariikhda dadka Soomaaliyeed

Bandhigaan ayaa socon doona mudo bil ah, iyada oo la filayo in ay u soo daawasho tagaan nus milyan qof.

MUQDISHO, Soomaaliya - Waxaa maanta lagu daahfuray magaalada Nairobi ee dalka Kenya, Bandhiga Dhaqanka, Fanka iyo Taariikhda dadka Soomaaliyeed kaasoo lagu soo bandhigay farshaxamka dadka Soomaalida.

Waxaa sidoo kale bandhiga maanta lagu soo bandhigay Agabka dhaqanka dadka ka soo jeeda isirka Soomaalida.

Bandhigaan ayaa socon doona mudo bil ah, iyada oo la filayo in ay u soo daawasho tagaan nus milyan kamida dadka ku dhaqan dalka Kenya.

Bodhigaan waxaa soo agaasimay safaarada Soomaaliya ee dalka Kenya iyo Madxafka Qaranka ee dalka Kenya.

Sawirada lagu soo badhigay waxaa soo aruuriyay, abaabulay, hal abuurkeedana lahaa Cali Saciid oo leh hay’adda Golol Gallery. Cali Saciid ayaa aruurinayay sawiradaan mudo ka badan 50 sano.

Diblomaasiyiinta caalamka ee fadhigoodu yahay dalka Kenya, mas’uuliyiin ka socda Dowlada Federaalka ah ee Soomaaliya iyo Dowlada Kenya ayaa ka qayb-galay Bandhigaan.

Danjiraha safaarada Soomaaliya ee dalka Kenya Mudane Jabril Ibrahim Abdulle ayaa si faahfaahsan uga hadlay muhiimada Bandhiga dhaqanka Soomaaliyeed, waxaana uuna sheegay in uujeedada bandhiga ahaa sidii caalamka loogu soo bandhigi lahaa dhaqanka Soomaaliyeed iyo taariikhda dadka Soomaalida.

Danjire Jabril Ibrahim Abdulle ayaa Mahadcelin balaaran u jeediyay qabanqaabiyayaasha iyo Marti sharafta kasoo qaybgashay.

Qabashada bandhigaan ayaa qayb ka ah barnaamijyada lagu weyneeynaayo looguna dabaaldagayo Todobaadka xorriyada.

GAROWE ONLINE