Norway oo safiir cusub usoo dirsatey Soomaaliya
-
- Posted On 18-03-2015, 02:13PM
March 18, 2015 (GO)- Madaxweynaha Dowladda Federaalka Soomaaliya Xasan Sheekh Maxamuud ayaa maanta waraaqaha aqoonsiga ka guddoomey danjiraha cusub ee dalka Norway u fadhin doona Soomaalya Mr. Victor Conrad Rønneberg.
Madaxweynaha ayaa dowladda Norway uga mahad celiyey soo magacaabista danjirahan cusub isagoo xusey in arrintani sii xoojin doonto xiriirka labada dal.
"aad ban kugu soo dhoweyneynaa dalka, waxaana kuu xaqiijinayaa in iskaashi buuxa iyo wadashaqeyn intaba aad ka heli doonto Soomaalida. Waxan kale oo aan Norway uga mahadcelinayaa taageerada ay nala garab taagan tahay oo muhiim u ah dib u dhiska dalkeena" Madaxweyne Xasan Sheekh ayaa sidaas yiri xilligii uu guddoomayey waraaqaha aqoonsiga ee safiirka Norway.
Madaxweynaha ayaa sidoo kale danjiraha uga warbixiyey xaaladaha siyaasadda, nabadgelyada, horumarinta iyo adeegyada bulshada, isagoo xusey in wax badan la qabtey, waxyaabo kalena ay dhiman yihiin.
Danjiraha cusub ee Norway Rønneberg ayaa isna dhankiisa sheegay in Norway ay sii kordhin doonto taageerada Soomaaliya, isagoo xusey inuu jiro qorshe cusub oo Norway ugu talagashey barnaamijyada kala duwan ee horumarinta ee Soomaaliya lagu taageerayo.
GAROWE ONLINE
