Qaramada Midoobay oo taageertay in wadahadal lagu xaliyo khilaaf doorasho iyo dastuur 

Muqdisho – Qaramada Midoobay ayaa si buuxda u taageertay tallaabada ay Dowladda Federaalka Soomaaliya ku qabanayso madal wadatashi qaran, iyadoo la casuumayo Golaha Mustaqbalka Soomaaliyeed, xilli cadaadiska siyaasadeed ee saaran Villa Somalia uu kor u sii kacayo.

Khilaaf ayaa ka taagan habka loo maamulo doorashada, iyadoo dhinacyada mucaaradku ay sheegeen in haddii Madaxweyne Xasan Sheekh Maxamuud uu diido wadahadal iyo heshiis siyaasadeed, ay diyaar u yihiin in ay doorasho ku qabtaan dalka si madaxbannaan.

Arrintan ayaa kor u qaaday walaaca ku saabsan khilaaf siyaasadeed oo ka dhalan kara doorashooyinka is-bar-bar socda, iyadoo waqtiga dastuuriga ah ee xil-heynta Madaxweynaha uu soo dhow yahay.

UNTMIS ayaa ugu baaqday dhammaan dhinacyada inay ka faa’iideystaan fursadda, si daacadnimo iyo wada-shaqeyn leh uga qaybqaataan wadahadallada, isla markaana lagu gaaro heshiis ku saabsan doorashooyin hufan oo loo dhan yahay, si looga hortago dib u dhac dowladnimada dalka.

Qaramada Midoobay ayaa tilmaantay in madashani ay muhiim u tahay xoojinta wadajirka siyaasadeed, ilaalinta dimoqraadiyadda, iyo hubinta in doorashooyinka soo socda ay noqdaan kuwo lagu kalsoonaan karo, taasoo gacan ka geysanaysa nabadda iyo xasiloonida dalka.

Mucaaradka ayaa aaminsan inuu Madaxweynaha rabo mudo-korarsi sharci-darro, maadaama aan socon wax diyaar garow doorasho ah, islamarkaana waqtiga dowladda 3 bilood ka dhiman yahay.

GAROWE OLINE