Qaybtii labaad ee qamadiga Ukraine oo la keenay Soomaaliya

Talaabadaan ayaa qeyb ka ah barnaamij ay Qaramada Midoobey taageereyso oo looga hortagayo cunta yarida aduunka.

MUQDISHO, Soomaaliya - Markab lagu magacaabo Neva ayaa Soomaaliya keenay 25,000 oo tan oo qamadi ah, taasoo qayb ka ah barnaamijka dhoofinta haruurka laga keeno Ukraine, sidda ay wararku sheegayaan.

Warsidaha Ukrinform ayaa warbixintan daabacay isaga oo soo xiganaya Wasaaradda dhulalka iyo horumarinta kaabayaasha dhaqaalaha Ukraine gaar ahaan qoraal ay soo dhigtay ciwaankeeda Facebook-ga.

"Waxaan hubnaa in qaybtan haruurka Ukraine ay noqon doonto tallaabo cusub oo loogu talagalay iskaashiga muddada dheer iyo la dagaalanka sababaha cunto yaraanta," ayuu yiri Wasiir ku xigeenka Ukraine ee dib u dhiska , Wasiirka Bulshooyinka, Dhulalka iyo Horumarinta Kaabayaasha Oleksandr Kubrakov.

Mr Kubrakov oo lagu soo xigtey isla warbixinta majaladda ayaa hadalkiisa wuxuu intaas ku daray: "Tani waa qaybteena dib u soo celinta mustaqbal ammaanka iyo xasiloonida cuntadda".

Sida laga soo xigtey Kubrako, markabka xamuulka qaada ee Neva ayaa ka tagay dekedda Odesa December 9 kharashaadka saadkana waxaa bixiyay dawladaha Finland, Faransiiska iyo Japan.

Qeybtii labaad ee sarreenka Yukreeniyaan ayaa horey usoo gaartey Soomaaliya bartamihii sanadkan. Talaabadaan ayaa qeyb ka ah barnaamij ay Qaramada Midoobey taageereyso oo looga hortagayo cunta yarida aduunka.

Qulqulka aduunka ee haruurka laga keeno Ukraine ayaa joogsadey ka gadaal markii Ruushka uu weeraray dalkaas. Duulaankaas wuxuu si ba'an u hakiyey ganacsiga qamadiga taasoo sababtey sicir-barar dowladaha qaarkood.

GAROWE ONLINE