Shaqaalaha garoonka Aden Adde oo shaqo joojin sameeyay kadib shaqo ka eryid

Muqdisho, Soomaaliya – Hawlaha garoonka diyaaradaha ee Aden Adde ayaa dhibaato ka dhashay Talaadadii, kadib markii shaqaale qaarkood ay shaqo joojin ku sameeyeen si ay uga horyimaadaan shaqo ka eryid dhowaan ka dhacday garoonka, taasoo ay fulisay shirkadda Turki ee Favori LLC oo maamusha garoonka ugu weyn Soomaaliya.

Warbixinno ka soo baxaya gudaha garoonka ayaa sheegaya in ugu yaraan 15 shaqaale la eryay, taasoo dhalisay caro xooggan oo ka dhex abuurantay shaqaalahii kale. Intii lagu guda jiray mudaharaadka, shaqaalaha shaqo joojinta sameeyay waxay soo bandhigeen magacyada iyo kaararka aqoonsiga ee dadka la eryay, iyagoo dalbanaya in si degdeg ah loogu soo celiyo shaqadooda.

Shaqaalahan oo xirnaa dharka garoonka ayaa gudaha terminal-ka ku socday iyagoo heesaya, waxaana ay maamulaka ku eedeeyeen in ay ku kacday tacaddiyo shaqo oo aan cadaalad ahayn.

“Go’aanka lagu eryay asxaabteena waa mid sharci darro ah wuxuuna saameyn ku yeeshay hawlaha maalinlaha ah ee garoonka,” ayuu mid ka mid ah shaqaalaha u sheegay weriyayaasha.

Mudaharaadayaashu waxay ugu baaqeen Dowladda Federaalka Soomaaliya in ay faragelin ku sameyso khilaafka, isla markaana ay hubiso in habraaca sharciga iyo xuquuqda shaqaalaha la dhowro.

Shirkadda Favori iyo maamulka Garoonka Aden Adde labaduba ma aysan soo saarin wax war rasmi ah oo ku saabsan shaqo ka eryida ama mudaharaadka.

Xaaladda ayaa weli xasaasi ahayd ilaa galabnimadii Talaadada, iyadoo shaqaalaha shaqo joojinta sameeyay diidan yihiin in ay shaqadooda ku laabtaan ilaa laga xalliyo cabashooyinkooda. Mudaharaadkan ayaa welwel ka dhaliyay suurtogalnimada carqalad ku timaadda hawlaha duulimaadyada ee garoonka, oo ka mid ah kuwa ugu mashquulka badan Geeska Afrika.

GAROWE ONLINE