Shiinaha oo Soomaaliya ku taageeraya la dirirka Al-Shabaab

Madaxwayneyaasha labada dal ayaa wadahadalo ku yeeshay magaalada Riyadh ee Sacuudiga.

RIYADH, Sacuudiga - Madaxweyne Xasan Sheekh Maxamuud oo ka qeyb galaya Shirka Shiinaha iyo dalalka Carabta ayaa kulan "miro-dhal ah" la qaatay dhigiisa waddanka Shiinaha Xi Jinping, sidda ay ku warantey Madaxtooyadda Qaranka.

Madaxweynaha ayaa la wadaagay Xi Jinping xaaladda dalka iyo dagaalka ka dhanka ah argagixisada, isagoo xusay guulaha wax ku oolka ah ee ay gaareen Ciidamada Soomaaliyeed oo kaashanaya bulshada deegaannada ay kuu dhuumaaleysanayaan argagixisada Al-Shabaab, sida laga soo xigtey Madaxtooyadda

Xi ayaa, sidda ku cad bayaanka ay faafisay Villa Soomaaliya, waxa uu tilmaamay in dalkiisu ay mar waliba aaminsan yihiin midnimada iyo madaxbanaanida Soomaaliya.

Qoraalka ayaa la raaciyey: "Isagoo soo bandhigay sida ay uga go’antahay garab istaaga Jamhruuiyaddda Federaalka Soomaaliya, gaar ahaan dagaalka ay kula jirto argagaxisada khawaaarijta, horumarinta kaabeyaasha dhaqaalaha iyo xaqiijinta qorshaha deyn cafinta".

"Sidoo kale, Labada Madaxweyne ayaa ka wada hadlaya xiriirka taariikhiga ah ee labada dal iyo sida Shiinuhu ay saaxiib dhow ula ahaayeen dowladda iyo shacabka Soomaaliyeed, iyagoo fuliyey mashaariic dhaxal-gal ah oo ilaa maanta ay dheefsadaan shacabka Soomaaliyeed," ayay tiri Villa Soomaaliya.

Xasan Sheekh ayaa Riyadh wuxuu kala qeyb galaya Madaxda, Amiirrada iyo Boqorrada dalalka Carabta Madadha Iskaashiga Shiinaha iyo Carabta oo lagaga arrinsanayo xoojinta xasilloonida mabdiqadda, horumarinta, isbeddelka cimilada iyo ganacsiga.

GAROWE ONLINE