Somalia: Buuq hareeyay kulankii Barlamanka
-
- Posted On 20-02-2016, 02:00PM
MUQDISHU-Kulankii golaha Barlamanka Somalia ee maanta ku yeesheen xaruntooda Muqdishu, ayaa kusoo gaba-gaboobay buuq iyo sawaxan ka dhashay ajandayaashii loo ballamay qaybtood oo qabsoomi waayay.
Fadhiga Xildhibaanada ayaa loo madlanaa inay horyimaadaan Wasiirka Amniga Somalia iyo Taliyaasha Nabadsugidda iyo Boliiska, waxaan waraaq uu mudanayaasha u akhriyay gudoomiye ku-xigeenka labaad ee Barlamanka ku xusnaa cududaar kayimi wasiirka Amniga oo sheegay inuusan imaan karin madasha ilaa laga gaarayo 25 bishan oo ah xilliga fadhiga Barlamanku soo xirmayo.
Mas'uuliyiinta loo yeeray, ayaa wax laga weydiin lahaa waxyaabo khuseeya xasaanadda mudanayaasha iyo amniga guud ee dalka.
Balse, baaqashada wasiirka Amniga ayaa keentay inay buuqaan Xildhibaanada kuwaasi oo diiday inay guda galaan ajandayaasha kale inta laga helayo mas'uuliyiinta loo yeeray, iyagoo gudoonka Barlamanka ku eedeeyay inuu uga baxay ballan.
Uga dambayn xalka ayaa noqday in lagu kala tago madasha, mana jirto cid faahfaahin kabixisay qorshaha laga yeeli doono arrintan, waxaana mudanayaashu u muuqdeen kuwo usoo diyaar garoobay su'aalo la weediyo wasiirka iyo taliyaasha.
GAROWEONLINE
