Somalia: Ciidamada dowladda oo la wareegay Buur-weyn Hiiraan
-
- Posted On 13-02-2016, 02:30PM
Ciidamada dowladda Federalka Somalia oo kaashanaya kuwa Midowga Afrika ee AMISOM ayaa xalay la wareegay gacan ku haynta degaanka Buur-weyn oo hoostagta degmada Buula burde ee gobolka Hiiraan.
Buur-weyn waxaa gacanta ku hayay mallayshiyaad katirsan Al Shabab.
Gudoomiyaha Buula-burde, Cabdicasiis Duuroow Cabdi oo la hadlay warbaahinta ku hadashada Afka dowladda Somalia, ayaa sheegay in deegaankaas ahaa goob Al-Shabaab dadka ku dhibaateyn jireen, isagoo xusay inay kula wareegeen xoog.
Duuroow, ayaa tilmaamay inay sii wadi doonaan dagaalka ay kula jiraan ururkaas isagoo xusay inay ka saari doonaan dhammaan goobaha ay kaga suganyihiin degmada Buula-burde.
“Buur-weyn oo u dhexeysa Jalalaqsi iyo Buulo-burte ayaan kala wareegnay maleeshiyada Al-Shabaab, mana jirto tabar kale oo ay Shabaabku halkaasi ku imaan karaan, runtii amniga deegaanka waa mid la isku haleyn karo,”Ayuu yiri gudoomiyuhu.
Al-Shabaab, ayaa kusugan qaybo kamid ah gobolkaasi.
GAROWEONLINE
